جاڭبىرلاتىپ جۇگەرى ءوسىرۋدى «رزا» شارۋا قوجالىعى باستاپ وتىر. ول ءۇشىن الدىمەن شەتەلدىك جاڭبىرلاتىپ سۋارۋ جۇيەسىن ورناتتى. سپرينكەرلىك جۇيە بويىنشا 2 مەتر تەرەڭدىككە درەناجدى قۇبىر جۇرگىزىلگەن. ول شايىلعان تۇزدى سۋدى ەگىستىكتەن شىعارادى جانە جەراستى سۋلارىنىڭ كوتەرىلۋىنە كەدەرگى بولادى.
ء«بىر ساعاتتا 1 شارشى مەترگە 8 ليتر سۋ كەتەدى. ءبىر جاعى سۋدى ۇنەمدەۋ, تۇزدى جۋ ءۇشىن 24 ساعات سۋاردىق. تىڭايتقىش, امموفوس, گەربيتسيدىن, 400 تونناداي مال قيىن توكتىك. سوقامەن جىرتىپ, تەگىستەپ, تىرمالاپ جۇيەگە كەلتىرىپ, دايىندادىق. ءار گەكتارىنان 450 تسەنتنەر ءونىم الساق دەپ وتىرمىز. تاڭەرتەڭ جانە كەشكىلىك سۋارىلىپ, ابدەن باپتالعان مال ازىعى 1200 باس سيىر وسىرىلەتىن تاۋارلى ءسۇت فەرماسىنا بەرىلەدى», دەيدى شارۋا قوجالىعىنىڭ تورعاسى جەڭىس قارابالاەۆ.
اۋداندىق اۋىل شارۋاشىلىعى ءبولىمى باسشىسىنىڭ ورىنباسارى ساپاربەك قۋاتوۆ سۋ تاپشىلىعىنا بايلانىستى ەگىس كولەمىن قىسقارتىپ وتىرعاندارىن ايتادى. اۋدان بويىنشا بيىل 17685 گەكتارعا داقىل ەگۋ جوسپارلانعان, ونىڭ 6637 گەكتارى كۇرىش.
تامىزدىڭ سوڭىندا جۇگەرى ورىلىپ الىنادى. ورنىنا قارا بيداي ءدانى سەبىلەدى. ونىڭ ءونىمى ەرتە كوكتەمدە جينالادى. وسىلايشا, ءارتاراپتاندىرۋ باعىتتارى جۇزەگە اسىرىلماق.
