جۋىردا وتكەن ءباسپاسوز كونفەرەنتسياسىندا وبلىستىڭ باس مەملەكەتتىك سانيتارلىق دارىگەرىنىڭ جازعى ماۋسىمدا دەمالىس ورىندارىنىڭ جۇمىس ىستەۋ ءتارتىبىن بەكىتەتىن قاۋلىسىنىڭ ەرەجەلەرى ءتۇسىندىرىلدى. تۋريزم جانە سىرتقى بايلانىستار باسقارماسىنىڭ باسشىسى مارات قاباقوۆ جىل باسىنان بەرى جازعى ماۋسىمعا دايىندىق اياسىندا كاسىپكەرلەردەن كەلۋشىلەرگە پتر انىقتاماسىنسىز قىزمەت كورسەتۋ تۋرالى كوپتەگەن ءوتىنىش كەلىپ تۇسكەنىن ايتتى.
كاسىپكەرلەردىڭ ۇسىنىستارى بويىنشا جازعى ماۋسىمدا تۋريستەردى ورنالاستىرۋ ورىندارى جاڭا فورماتتا جۇمىس ىستەيتىن بولادى. ونى كاسىپكەرلەردىڭ وزدەرى ۇسىنعان. ەندى ءۇرجار, كاتونقاراعاي جانە التاي اۋداندارىنىڭ بارلىق دەمالىس بازاسىندا Ashyq جۇيەسى ورناتىلۋى ءتيىس. جۇيە بويىنشا «كوك» جانە «جاسىل» دەڭگەيدەگى دەمالۋشىلار دەمالىس بازاسىنا كىرە الادى. سونىمەن قاتار دەمالىس ورتالىقتارىنا كوروناۆيرۋسقا قارسى ۆاكتسينالاۋ تولقۇجاتىن كورسەتكەن ازاماتتار دا جىبەرىلەدى.
– تۋريستىك-رەكرەاتسيالىق ايماقتاردا دەمالعىسى كەلەتىن ادامدار تەرىس ناتيجەسى بار پتر- تەستىلەۋ تۋرالى نەمەسە Covid-19 ىندەتىنە قارسى ۆاكتسينالاۋدىڭ تولىق كۋرسىن العانىن راستايتىن قۇجاتى بولۋى كەرەك. دەمالىس بازاسىندا ينتەرنەت ىستەمەي, Ashyq قوسىمشاسىن ىسكە قوسۋ مۇمكىن بولماسا دا, ساپاردان بۇرىن ۇيدەن شىقپاي-اق ءوزىڭىزدى تەكسەرىپ, دەمالىس ورنىنا جەتكەن سوڭ سول اقپاراتتى ۇسىنۋعا بولادى, – دەيدى وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى عالىمبەك الين.
ونىڭ ايتۋىنشا, «سارى» جانە «قىزىل» مارتەبەسى بار دەمالۋشىلارعا تۋريستىك-رەكرەاتسيالىق ايماقتارعا كىرۋگە رۇقسات جوق. بۇل كوروناۆيرۋس تارالۋىنىڭ الدىن الۋ ءۇشىن ىستەلىپ جاتقان شارا ەكەنى تۇسىنىكتى. دەمالىس ورىندارىندا الەۋمەتتىك ارا قاشىقتىقتى ساقتاۋ ءۇشىن بەلگىلەر دە جاسالادى. ەرەجەدە كورسەتىلگەندەي, جاعاجايدا دەمالۋشىلار 1,5 مەتر قاشىقتىقتى ساقتاۋلارى كەرەك ەكەن. ال كوپشىلىك جينالاتىن ورىن ۋاقىتىمەن دەزينفەكتسيالانادى.
وبلىستىق كاسىپكەرلەر پالاتاسىنىڭ ديرەكتورى قايرات مامىرباەۆتىڭ ايتۋىنشا, الاكولدىڭ جاعالاۋىندا 188 دەمالىس ورنىنىڭ 153-ءى اۋماقتىق سانيتارلىق-ەپيدەميالىق باقىلاۋ باسقارماسىنىڭ قورىتىندىسىن الدى. 9 دەمالىس بازاسى Ashyq جوباسىنا قوسىلدى. التاي اۋدانىندا 102 دەمالىس ورنىنىڭ تەك ەكەۋى عانا Ashyq قوسىمشاسى بويىنشا QR-كود الۋعا ءوتىنىم بەردى. ال كاتونقاراعاي اۋدانىندا 23 بازانىڭ بىرەۋى عانا QR-كود الماق.
تۋريزم جانە سىرتقى بايلانىستار باسقارماسىنىڭ باسشىسى مارات قاباقوۆتىڭ ايتۋىنشا,
17-20 مامىر ارالىعىندا الاكولدىڭ جاعالاۋىندا كەشەندى جۇمىس توبى سانيتارلىق-ەپيدەميالىق, ءورت قاۋىپسىزدىگى, قوعامدىق ءتارتىپتى ساقتاۋ, سۋداعى قاۋىپسىزدىك بويىنشا مونيتورينگ جاساپ, ءتۇسىندىرۋ جۇمىستارىن جۇرگىزدى. شومىلۋ ماۋسىمىندا التى ادامنان تۇراتىن قۇتقارۋشىلار جانە 2 اۆتوكولىك پەن ءجۇزۋ قۇرالدارى جۇمىلدىرىلادى.
– جاعالاۋ سىزىعىنىڭ بويىندا 4 باقىلاۋ ورنى بار. ەندى سۋ ايدىندارىنداعى قاۋىپسىزدىك قاعيدالارىنىڭ تالاپتارىنا سايكەس قاجەتتى جابدىعى بار قۇتقارۋ بەكەتىن ورناتۋ جوسپاردا بار. كيىم اۋىستىرۋ ءۇشىن قوسىمشا 15 كابينا ورناتۋ, 100-گە جۋىق قوقىس كونتەينەرلەرىن ساتىپ الۋ ويدا بار, – دەيدى مارات قاباقوۆ.
ءۇرجار اۋىلىنداعى اۋەجايدىڭ ۋاقىتشا جابىلۋىنا بايلانىستى نۇر-سۇلتان, الماتى, وسكەمەن, سەمەي قالالارىنان الاكولگە باعىت العان پويىز ۆاگوندارىنىڭ سانى ارتتى. بارلىعى 3 330 ورىندىق 69 ۆاگون ىسكە قوسىلىپ, اپتاسىنا 3 رەت جونەلتىلەتىن بولادى. سونىمەن قاتار اۆتوبۋستار سانى ەكى ەسە ارتتى. جازعى ماۋسىمدا كۇن سايىن 768 ورىندىق 16 اۆتوبۋس ىسكە قوسىلادى. قازىرگى ۋاقىتتا كەشەندى جۇمىس توبى بۇقتىرما سۋ قويماسى مەن سىبە كولدەرىنىڭ جاعالاۋلارىن تەكسەرۋ ۇستىندە.
شىعىس قازاقستان وبلىسى
