قازىر رەسپۋبليكاعا بەلگىلى ءفوتوتىلشى بولات وماراليەۆ كەزىندە فوتوەتيۋدتەرمەن اۋەستەنىپ, كوپ ۋاقىتىن سوعان جۇمسادى. جارتى عاسىرلىق شەجىرەسى بار بايقاۋلاردا بايىرعى ءفوتوتىلشىنىڭ «اتى تالاي بايگەدەن كەلگەن». بۇگىندە سول تاماشا جۇمىستاردىڭ ءبىرىنىڭ تاريحىن بايانداي كەتۋدىڭ رەتى كەلىپ تۇر. ەستەلىكتى اقىن اسقار كىرەباەۆ ءبولىستى.
«ول كەزدە اۋداندىق گازەتتە ىستەيمىز. ءبىر كۇنى ءبىزدىڭ ۇيدەن تۇسكى اس ءىشىپ وتىرعاندا مەن بولاتقا: «سەن فوتوەتيۋد تۇسىرگىش بولساڭ, ساعان ءبىر-ەكى سيۋجەت بەرەمىن. سونى ءتۇسىرىپ الساڭ, ەلدەن وزاسىڭ», دەدىم ازىلدەپ.
شاي ءىشىپ بولعان سوڭ ءتورت جاسار ۇلكەن ۇلىم شىڭعىستىڭ قولىنا دومبىرا ۇستاتىپ, ديۆانعا وتىرعىزدىق. بولات فوتواپپاراتىن دايىنداپ وتىر. اشەيىندە دومبىرانى قولىنا ۇستاپ وتىرا قالاتىن بالام بۇل جولى بولاتتان ۇيالدى ما, قىرسىقتى دا قالدى. «شىڭعىس, ولەڭ ايت, مىنانى ايت, انانى ايت», دەپ جالىنىپ جاتىرمىن, بولمايدى.
داعدارعان كەزىمدە مۇنىڭ ەركەلىگىن وزىنە پايدالانايىن دەدىم دە, «شىڭعىس, بولات يت قوي», دەپ ايقايلا دەدىم. قيقايىپ وتىرعان بالا قۇلپىرىپ سالا بەردى. ءوزى ديۆاندا, دومبىرا قولىندا, كوزى جۇمۋلى, الگى ءسوزدى ايقايلاپ قويا بەرسىن. مەن تاعى ايت دەپ كوتەرمەلەيمىن, ەركە بالاعا ءبىر ەرمەك تابىلدى. ال مۇنداي سيۋجەتتى ىزدەسە دە تابا المايتىن بولات بالا يت دەمەك تۇگىل, شوشقا دەسە دە قارايتىن ەمەس, مۇرنى پىسىلداپ, جان-جاعىنان سارتىلداتىپ ءتۇسىرىپ جاتىر.
وبالى نە كەرەك, بولاتتىڭ ءوزى دە سۋرەتتىڭ ءپىرى عوي, ادەمى فوتوەتيۋد ءتورت جاسار بالا ءان شىرقاپ وتىرعانداي شىقتى. كەيىن 1979 جىلى «سوتساليستىك قازاقستان» گازەتى «بەس جىلدىق جانە ءبىز» فوتو بايگەسىن جاريالادى. كۇن سايىن, جىل اياعىنا دەيىن فوتوبايگەنىڭ سۋرەتتەرى جاريالانىپ تۇردى.
بايقاۋعا مىڭداعان سۋرەتپەن جۇزدەگەن ءفوتوتىلشى قاتىستى. بولات باس بايگەنى ء«ان سالايىن اۋەلەتىپ» دەگەن وسى سۋرەتىمەن جەڭىپ الدى.
«سق» جىگىتتەرى بىلەدى. گازەت شىعىپ كەتكەننەن كەيىن وندا جاريالانعان سۋرەتتەردىڭ تۇپنۇسقاسى كوپكە دەيىن ساقتالادى. سودان «سق» حاتشىلىعىنا جازۋشى اسقار سۇلەيمەنوۆ بارىپ قالماي ما؟ الگى سۋرەت قىزىقتى كومپوزيتسياسىمەن اسەكەڭنىڭ كوزىنە وتتاي باسىلىپ, قولىنا الىپ:
– جىگىتتەر, مىنا سۋرەت قايدان؟ – دەپ سۇرايدى.
– قىزىلوردادان. بولات وماراليەۆ دەيتىن شتاتتان تىس ءتىلشىمىزدىڭ دۇنيەسى.
– ولاي بولسا, وسى بالا نە يرانبەكتىڭ, نە اسقاردىڭ بالاسىنىڭ سۋرەتى. ءتىپتى باسقا ايەلىنەن تاپسا دا, سول ەكەۋىنىڭ بالاسى دەپتى دە, سۋرەتتى قالتاسىنا سالىپ الىپتى.
بۇل سۋرەت اسەكەڭ اكادەميالىق تەاتردا ادەبيەت ءبولىمىنىڭ مەڭگەرۋشىسى بولعان كەزىندە, ءبىراز جىل جاقتاۋعا سالىنىپ, ءىلۋلى تۇردى», دەپ ەسكە الادى اقىن اسقار كىرەباەۆ.
