قۇرىلتايدا قازاقستاننىڭ ۋكرايناداعى ەلشىسى دارحان قالەتاەۆ قۇتتىقتاۋ ءسوز سويلەپ, اعايىندارعا اتاجۇرتتىڭ ىستىق سالەمىن جەتكىزدى.
اتالعان ءىس-شاراعا ۋكراينانىڭ ەتنوساياسي جانە ار-وجدان بوستاندىعى جونىندەگى مەملەكەتتىك قىزمەتىنىڭ توراعاسى ەلەنا بوگدان, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ جانە ۋكراينا جوعارعى راداسىنىڭ حالىق دەپۋتاتى, قازاقستانمەن ىنتىماقتاستىق جونىندەگى پارلامەنتارالىق توپتىڭ مۇشەسى سەرگەي ناگورنياك ارنايى قاتىستى.
قۇرىلتايدىڭ ەكىنشى بولىمىندە كيەۆ قالاسىنداعى «دوستىق» قازاق مادەني قوعامىنىڭ باسشىسى دانيار ەگامبەرديەۆ, حاركوۆ قالاسىنداعى ۇلتتىق «بىرلىك» قب باسشىسى ماككا قاراجانوۆا جانە قازاق دياسپوراسىنىڭ وكىلى رۇستەم جانعوجا شەتتەگى اعايىندار اتىنان ءسوز سويلەپ, اتاجۇرتپەن اراداعى رۋحاني, مادەني, ەكونوميكالىق بايلانىستاردىڭ ارتۋىنا كۇش سالاتىندارىن ايتتى. سونداي-اق ەكى ەلدىڭ تاتۋلىعىنىڭ ارقاسىندا تالاي بەلەستەردى باعىندىراتىنىنا سەنىم ءبىلدىردى.
ەتنوستىق ونەر قايراتكەرلەرى قاۋىمداستىعى باسقارماسىنىڭ پرەزيدەنتى, ۋكراينانىڭ ەڭبەك سىڭىرگەن ءارتىسى ينەش كدىروۆا ءوز سوزىندە ۋكراين جانە قازاق حالىقتارىنىڭ بەرىك دوستىق قارىم-قاتىناسىنا ريزاشىلىعىن جەتكىزدى.
سونىمەن قاتار قۇرىلتاي سوڭىندا جاڭا قاۋىمداستىق باسشىسى سايلانىپ, وسىعان دەيىن اتقارىلعان باعدارلامالار مەن جوبالارعا قاتىستى ۇسىنىس-پىكىرلەر تالقىلاندى جانە دۇنيە جۇزىندەگى قازاقتارعا قازاقستان تاۋەلسىزدىگىنىڭ 30 جىلدىعى مەن ەلدە جۇرگىزىلىپ جاتقان ءتۇرلى رەفورمالارعا قولداۋ بىلدىرىلگەن ارنايى ۇندەۋ جولداندى.
ودان بولەك, قوعامدىق جۇمىسقا بەلسەنە ارالاسقان اعايىندار قازاقستاننىڭ ۋكرايناداعى ەلشىسى مەن «وتانداستار قورىنىڭ» العىس حاتىمەن ماراپاتتالدى.
