قازاقستانمەن كورشىلەس رەسەي اراسىنداعى ستراتەگيالىق ارىپتەستىك پەن ىنتىماقتاستىقتىڭ ناتيجەسىندە «بايقوڭىر» عارىش ايلاعىن ساقتاپ, جارتى عاسىردان اسا ۋاقىت ونىڭ ينفراقۇرىلىمىن ءتيىمدى پايدالانىپ كەلەمىز. سونداي-اق بۇگىندە «بايقوڭىردى» عارىش سالاسىنىڭ عانا ەمەس, تۋريزم يندۋسترياسىنىڭ الەمدىك برەندىنە اينالدىرۋعا تولىق مۇمكىندىك بار.
الەمدىك تاجىريبە عارىش ءتۋريزمىن دامىتۋدىڭ تارتىمدىلىعى مەن ەكونوميكا جاعىنان تيىمدىلىگىن كورسەتەدى. قازىردىڭ وزىندە ينفراقۇرىلىمى دامىعان, قولجەتىمدى باعا ۇسىناتىن وسىنداي عارىش ورتالىقتارى جىلىنا 1,5 ميلليون ءتۋريستى قابىلداپ, 270 ملن اقش دوللارىنا دەيىن تابىس تابادى. اتالعان كەشەندەگى ينفراقۇرىلىمى دامىعان ويىن-ساۋىق ورتالىقتارى, ءتۇرلى شوۋ-باعدارلاما, ەكسكۋرسيالار وسىنداي ناتيجەگە قول جەتكىزۋگە مۇمكىندىك بەردى.
Kazakh Tourism ۇلتتىق كومپانياسىنىڭ باسقارما توراعاسى ەرجان ەركىنباەۆتىڭ ايتۋىنشا, الەمدە عارىش تۋريزمىنە سۇرانىس جىل سايىن كەم دەگەندە 9%-عا ءوسىپ كەلە جاتىر.
– «بايقوڭىر» عارىش ايلاعىندا ءتۋريزمدى دامىتۋدى ءبىز سۇرانىسقا يە سالالىق باعىتتاردىڭ ءبىرى رەتىندە قاراستىرامىز. زەرتتەۋلەرگە سۇيەنسەك, بۇكىل الەم بويىنشا 280 ميلليونعا جۋىق تۋريست سالالىق ءتۋريزمنىڭ ءتۇرلى باعىتىن تاڭدايدى. ونىڭ ىشىندە الەم حالقىنىڭ 9 پايىزى جىل سايىن عارىشتىق ءتۋريزمدى تاڭدايدى. «بايقوڭىردىڭ» ادام ەركى مەن اقىل-ويىنىڭ دارەجەسىن كورسەتەتىن دەڭگەيىن ءالى كەڭ كولەمدە كورسەتە الماي كەلەمىز. وسى ولقىلىقتىڭ ورنىن تولتىرۋ ماقساتىندا مادەنيەت جانە سپورت مينيسترلىگى مەن Kazakh Tourism بىرلەسىپ ماركەتينگ, بەينەكونتەنتتى ىلگەرىلەتۋ جانە ودان ءارى دامۋ ماسەلەلەرىن پىسىقتاۋ بويىنشا بەلسەندى جۇمىس ىستەپ جاتىر.
وسى رەتتە «بايقوڭىردى» قولجەتىمدى ساياحات ورنىنا اينالدىرۋ ءۇشىن ءبىرىنشى كەزەكتە عارىش ايلاعىنا كىرۋ ماسەلەسىن شەشۋ قاجەت.
جاقىندا پرەمەر-مينيستر اسقار مامين باستاعان قازاقستاندىق تاراپ رەسەيلىك ارىپتەستەرىمەن كەزدەسۋ بارىسىندا قالا مەن عارىش ايلاعىنىڭ اۋماعىنا باقىلاۋ-وتكىزۋ رەجىمىن جەڭىلدەتۋدى ۇسىندى. سونىمەن قاتار ەڭ زاماناۋي ستاندارتتارعا ساي جابدىقتالعان جانە تۇراقتى رەيستەردى قابىلداۋعا دايىن «كرايني» اۋەجايىن پايدالانۋ جايىن ۇسىندى. ال ۇزاقمەرزىمدى پەرسپەكتيۆادا «بايقوڭىر» اۋماعىنا ۆيزاسىز رەجىم ەنگىزۋ شەتەلدىك تۋريستەردى تارتۋدىڭ ءتيىمدى شاراسى بولۋى مۇمكىن.
كەزدەسۋ اياسىندا ىسكە اسىرۋعا دايىن جوبالاردىڭ يدەيالارى ايتىلدى. «عارىش ايلاعىندا تەمىر جول جەلىسى دامىعان كەشەن اۋماعىندا تۋريستىك پويىزدى ىسكە قوسۋ ارقىلى بالالار مەن جاسوسپىرىمدەر ءتۋريزمىن دامىتۋعا العىشارت جاساۋعا بولادى. بۇدان بولەك قازىردىڭ وزىندە بىرقاتار قىزىق جوبانى ىسكە قوسۋعا مۇمكىندىك بار», دەدى ەرجان ەركىنباەۆ.
جۋىردا عارىش ايلاعىنىڭ اۋماعىنا كەلگەن تۋريستەر ءۇش كۇن نەمەسە ودان دا ۇزاق مەرزىمگە تۇراقتاي الۋى ءۇشىن تاقىرىپتىق ساياباق, عارىشتىق اتتراكتسيوندار, قوناقۇي كەشەندەرى جانە دەمالىس ورىندارى بار تۋريستىك ايماق پايدا بولماق.
«بايقوڭىر» جاقىن ارادا الەمدىك عارىشتىق ءتۋريزمنىڭ جاڭا نۇكتەسىنە اينالادى دەگەن ءۇمىت بار.
