اتالعان جوباعا بۇگىنگە دەيىن باس-اياعى 133 نىسان قوسىلعان. ولاردىڭ ىشىندە كوپشىلىك باس قوساتىن بيزنەس نىسانمەن قاتار, تەاتر, مادەنيەت ءۇيى مەن كونتسەرت زالدارى دا بار. مىسالى, قازىر ءىلياس وماروۆ اتىنداعى قوستاناي وبلىستىق قازاق دراما تەاترىنا كورەرمەندەر تەك Ashyq ءموبيلدى قوسىمشاسى ارقىلى عانا كىرە الادى. «اشىققا» تىركەلگەندەردىڭ تولىق ءتىزىمى جاسالىپ, قوستاناي وبلىسى اكىمدىگىنىڭ رەسمي سايتىنا ورنالاستىرىلعان.
– وتكەن جۇمادا ءبىر جىلدان ارتىق ۋاقىتتان بەرى جابىق تۇرعان كاراوكە-بارىمىز اشىلدى. مۇنداي مۇمكىندىككە Ashyq جوباسى ارقىلى يە بولىپ وتىرمىز. مەن تەك كاراوكەگە عانا ەمەس, ءوزىمنىڭ وتباسىلىق مەيرامحانام مەن جازعى اشىق اسحاناما دا QR-كود الدىم. ەندى بۇكىل ۇجىم بولىپ جۇمىسقا شىعامىز. بىزگە قويىلىپ وتىرعان تالاپ تا كوڭىلگە قونادى: ءبىر كەزەكتە 50 ادامعا دەيىن قابىلداي الامىز جانە تۇنگى ساعات 2-گە دەيىن جۇمىس ىستەيتىن بولامىز. وسى سالادا جۇرگەن سوڭ, قالامىزداعى ءبىراز قوعامدىق تاماقتاندىرۋ ورىندارىنىڭ يەلەرىن تانيمىن. ولار دا قۋانىپ جاتىر, – دەدى كاسىپكەر باقىت بەيىسوۆا.
ازىرشە وبلىستا 86 نىسان عانا Ashyq-تىڭ تولىق قاتىسۋشىلارى بولىپ تىركەلگەن. 47 نىسان تەستىك رەجىمدە جۇمىس ىستەپ جاتىر. بۇدان وزگە 12 نىسان تىركەۋدەن ءوتۋ ۇستىندە. جوباعا قوسىلۋعا ءوتىنىم بەرگەندەردىڭ ىشىندە ورتالىق ستاديون مەن «توبىل ارەنا» سىندى ءىرى سپورت نىساندارى دا بار.
– Ashyq-قا قوسىلىپ جاتقان بيزنەس نىساندارى مەن تۇرعىندار اتالعان جوباعا ەرىكتى تۇردە قاتىسىپ جاتىر. بۇل جوبانى ەنگىزۋدەگى باستى ماقسات – ەڭ الدىمەن, قالا تۇرعىندارىن ىندەت جۇقتىرۋ قاۋپىنەن ساقتاۋ ەكەندىگىن ەستەرىڭىزگە سالا كەتكىم كەلەدى. بۇل قوسىمشانى ورناتقان عيماراتقا كوروناۆيرۋس جۇقتىرعان ادام كىرە المايدى. اسىرەسە بيزنەستىڭ ۇتاتىن جەرى كوپ. جوباعا قاتىسقان كاسىپورىندار, ءتىپتى «قىزىل» نەمەسە «سارى ايماققا» ەنگەن جاعدايدا دا جۇمىسىن توقتاتپايدى, – دەدى وبلىستىق كاسىپكەرلەر پالاتاسىنىڭ ديرەكتورى مۇرات ابەنوۆ.
Ashyq ورناتىپ اشىلعان كوپشىلىك ورىننىڭ ءبىرى – FitnessBlitz فيتنەس-ورتالىعى. ول QR-كودتى تاياۋدا عانا الىپتى.
– تىركەلۋ كوپ ۋاقىت العان جوق. الدىمەن قوسىمشامەن ءوزىمىز تانىسىپ العان سوڭ, بۇل تۋرالى تۇراقتى كليەنتتەرىمىزگە حابار بەرەمىز. الداعى كۇندەرى وسى QR-كود ارقىلى جۇمىس ىستەي باستايمىز. Ashyq جوباسىنا قاتىسۋداعى ماقساتىمىز – بىرىنشىدەن, ءبىز ءوز كليەنتتەرىمىزدى ىندەت جۇقتىرىپ الۋدان قورعاۋىمىز كەرەك. ەكىنشىدەن, بۇل قوسىمشا شىقپاي تۇرعاندا ءبىزدىڭ فيتنەس-ورتالىق ەپيدەميالىق جاعدايعا بايلانىستى كوپتەن بەرى جۇمىس ىستەمەي قالىپ, قىرۋار شىعىنعا باتتىق. Ashyq قوسىمشاسىمەن ءبىز ەندى «قىزىل ايماقتان» دا قورىقپايمىز, – دەدى FitnessBlitz فيتنەس ورتالىعىنىڭ ديرەكتورى رەنات كيم.
قوستاناي وبلىسى
