«Ashyq» ءموبيلدى قوسىمشاسى مەيرامحانالار مەن دەمالىس ورىندارىنان بولەك, الماتى اۋەجايىنا دا ورناتىلدى.
بۇگىنەن باستاپ جولاۋشىلار ۇشاققا وتىرماس بۇرىن, ءوز ستاتۋسىن سكانەرلەۋ ارقىلى انىقتاپ, اۋەجاي قىزمەتكەرىنە كورسەتۋى ءتيىس. ايتا كەتەيىك, جولاۋشىلارعا ستاتۋس «پتر-زەرتتەۋلەردىڭ بىرىڭعاي ينتەگراتسيالىق پورتالى» جانە «قازاقستان رەسپۋبليكاسى دەنساۋلىق ساقتاۋ مينيسترلىگىنىڭ COVID-19 باقىلاۋ ورتالىعى» اقپاراتتىق جۇيەلەرىمەن سالىستىرۋ نەگىزىندە بەرىلەدى.
«جاسىل» – ءجۇرىپ-تۇرۋىندا شەكتەۋ جوعىن بىلدىرەدى, مۇنداي ادام بازادا COVID-19 ىندەتىنە پتر-تەستىلەۋى تەرىس ناتيجە كورسەتكەن پايدالانۋشى بولىپ سانالادى.
«كوك» – اۋرۋ جۇقتىرعان ادامدارمەن بايلانىستا بولعان ادامدار ەسەبىندە جوق, پتر-تەست تالاپ ەتىلەتىن جەرلەردەن باسقا كەز كەلگەن ورىندا ەركىن قوزعالۋ دەگەندى بىلدىرەدى.
«سارى» – بايلانىستا بولعان ادامدارعا بەرىلەتىن مارتەبە. ولارعا ازىق-ت ۇلىك الۋعا نەمەسە ءۇيدىڭ جانىنداعى دارىحاناعا بارۋعا رۇقسات ەتىلگەنمەن, باسقا قوعامدىق ورىندارعا بارۋىنا تىيىم سالىنادى.
«قىزىل» ستاتۋس — پتر-تەست تاپسىرىپ, كوروناۆيرۋس انىقتالعان ادامعا بەرىلەدى. مۇنداي مارتەبە يەلەرى ۇيدە وقشاۋلانۋ رەجيمىن قاتاڭ ساقتاۋى ءتيىس. «قىزىل» نەمەسە «سارى» ءتۇس مارتەبەسىن كورسەتكەن جولاۋشىلار ۇشاق بورتىنا جىبەرىلمەيدى. وسىلايشا شەكتەۋ قويۋ ارقىلى, وزگەلەردىڭ قاۋىپسىزدىگىن قامتاماسىز ەتۋگە مۇمكىندىك بەرەدى دەيدى ماماندار.
ال 18 جاسقا تولماعان بالالارعا قوسىمشانى پايدانباي ەركىن كىرۋىنە رۇقسات. الماتى حالىقارالىق اۋەجايىنىڭ ءباسپاسوز قىزمەتىنىڭ مالىمەتىنشە, اۋەجايدا «Ashyq» ءموبيلدى قوسىمشاسى 16 مامىردان باستاپ پيلوتتىق رەجيمدە باستالعان. وسى ارالىقتا 24 ادامدا قىزىل ءتۇس, ال 15 ادامدا سارى بەلگى انىقتالدى. ولاردىڭ بارلىعى اۋەجايعا وتكىزىلمەدى. بۇل رەتتە جولاۋشىلارعا اۋە كومپانياسى بيلەت قۇنىن تولىقتاي وتەپ بەرۋى كەرەك نەمەسە ۇشۋ ۋاقىتىن باسقا كۇنگە اۋىستىرۋى قاجەت.
«جوبانى ازىرلەۋشىلەر بارلىق تەحنيكالىق تۇستارىن دا قاراستىرعان. قازىر جۇيە جاقسى جۇمىس ىستەپ تۇر. ەشقانداي اقاۋلار بولمايدى دەپ سەنەمىز. جۇيە ىستەن شىققان جاعدايدا, ءبىز شىعارىپ سالۋشىلارعا ەمەس, ءبىرىنشى كەزەكتە جولاۋشىلاردى كىرگىزۋگە باسىمدىق بەرەتىن بولامىز. ودان بولەك, ءبىز ءوز تاراپىمىزدان جولاۋشىلاردى ۇزاق كۇتتىرمەۋ ءۇشىن قوسىمشا كىرەبەرىستەر اشتىق, دالىزدەر ۇيىمداستىردىق», دەدى «الماتى حالىقارالىق اۋەجايى» اق ءباسپاسوز حاتشىسى.
