وسىدان كەيىن نارىقتا جاڭا ويىنشى – تۇرعىن ءۇي قۇرىلىسىنىڭ بىرىڭعاي وپەراتورى – «قازاقستان تۇرعىن ءۇي كومپانياسى» اق پايدا بولدى. ەندى, مىنە, بىرىڭعاي وپەراتور قۇرىلىس سالۋشىلاردىڭ جاۋاپكەرشىلىگىن ارتتىرۋعا نيەتتى. ول ءۇشىن زاڭناماعا بىرقاتار وزگەرىس ەنگىزۋدى كوزدەپ وتىر.
بىرىڭعاي وپەراتوردىڭ مىندەتىنە قۇرىلىس پەن ونى دامىتۋ عانا ەمەس, سونداي-اق مەملەكەتتىك باعدارلامالار بويىنشا ىسكە اسىرىلعان تۇرعىن ءۇيدى ودان ءارى باسقارۋ دا كىرەدى. ال بيىل جىل سوڭىنا دەيىن ەلىمىزدە شامامەن 17 ملن شارشى مەتر تۇرعىن ءۇي سالىنۋى كەرەك.
بۇگىندە قازاقستان تۇرعىن ءۇي كومپانياسىنىڭ قورجىنىندا ەل بويىنشا 395 نىساندا 22 مىڭنان استام پاتەر بار. قايتا ۇيىمداستىرۋ كەزىندە ولاردىڭ ءبىر بولىگى «بايتەرەك دەۆەلوپمەنت» اق-تان بەرىلگەن بولاتىن. بۇلار – قۇرىلىسىنداعى اقاۋلارعا قاتىستى شاعىم ءجيى ايتىلعان ءارى ينجەنەرلىك ولقىلىقتارى كوپ پروبلەمالىق نىساندار. ۇيلەردىڭ كوبىنىڭ كەپىلدىك مەرزىمى ءوتىپ كەتكەن. جەكەلەگەن نىساندار بويىنشا قۇرىلىس سالۋشىلار قارجىلىق تۇرعىدان دارمەنسىز دەپ تانىلدى نەمەسە سوت پروتسەسىنەن وتۋدە. كليەنتتەرگە كومەكتەسۋ ءۇشىن كومپانيا پروبلەمالاردى ءوز ەسەبىنەن شەشەدى.
– جاقىندا وسكەمەندە قۇرىلىس تەحنولوگياسىنىڭ ساقتالماۋىنان دەفورماتسيالىق جىكتەردىڭ جارىلۋى بولدى. قاراعاندىدا مەملەكەتتىك باعدارلاما بويىنشا پايدالانۋعا بەرىلگەن ۇيلەردىڭ بىرىندە شاتىرعا قاتىستى پروبلەمالار بار. جاقىن ارادا بىزگە بەرىلگەن نىساندارعا اۋقىمدى تەحنيكالىق تەكسەرۋ جۇرگىزۋدى جوسپارلاپ وتىرمىز. ويتكەنى بۇلارعا تۇرعىندار تاراپىنان شاعىم كوپ تۇسەدى. ءاربىر نىسان بويىنشا جەكە شەشىم قابىلدانىپ, ءتيىستى جۇمىستار جۇرگىزىلەتىن بولادى, – دەيدى «قازاقستان تۇرعىن ءۇي كومپانياسى» اق تەحنيكالىق مونيتورينگ دەپارتامەنتىنىڭ ديرەكتورى ءادىلجان قابىلدين.
بولاشاقتا مۇنداي جاعدايلاردىڭ الدىن الۋ ءۇشىن قازاقستان تۇرعىن ءۇي كومپانياسى زاڭناماعا بىرقاتار تۇزەتۋ ەنگىزۋدى جوسپارلاپ وتىر. سونداي-اق قۇرىلىس پروتسەسىنە قاتىسۋشىلاردىڭ بارلىعىنىڭ جاۋاپكەرشىلىگىن قاتاڭداتۋعا باسا ءمان بەرىلمەك. بۇدان بولەك كەپىلدىك مىندەتتەمەلەرىنىڭ مەرزىمىن ۇلعايتۋ دا جوسپاردا بار.
بۇگىندە تۇرعىن ءۇي قۇرىلىسى نىساندارى بويىنشا تىرەۋ جانە قورشاۋ كونسترۋكتسيالارىنا 10 جىل كەپىلدىك بەرىلەدى. ينجەنەرلىك جابدىققا بەرىلەتىن كەپىلدىك مەرزىمى 3 جىلدى قۇرايدى. ال قالعاندارىنا نىسان پايدالانۋعا بەرىلگەن ساتتەن باستاپ بار بولعانى 2 جىل عانا كەپىلدىك ۇسىنىلادى. پاتەرلەردىڭ ءبارى بىردەي ساتىلىپ كەتپەيدى. سوندىقتان كليەنتتەر كەپىلدىك مەرزىمى ءوتىپ كەتكەن پاتەرلەردى دە ساتىپ الىپ ءجۇر.
– ءبىز كليەنتتەرىمىزدىڭ مۇددەسىن قورعايمىز. ولاردىڭ كوپشىلىگى – حالىقتىڭ الەۋمەتتىك وسال توپتارىنا جاتاتىن ادامدار. ونىڭ ۇستىنە ولار بۇل تۇرعىن ءۇيدى ۇزاق جىلدار كۇتتى ءارى كوپتەگەن جىل بويى جالداۋ اقىسىن تولەيدى. سوندىقتان قۇرىلىس سالۋشىلاردىڭ سالىنىپ جاتقان ۇيلەرگە عانا ەمەس, ونىڭ ودان كەيىنگى ساپاسىنا دا جاۋاپ بەرۋى ماڭىزدى, – دەيدى مونيتورينگ دەپارتامەنتىنىڭ ديرەكتورى.
