نۇرجان اشىمبەتوۆتىڭ اقسۋ قالاسىنىڭ اكىمى بولىپ تاعايىندالعانىنا نەبارى ءتورت اي عانا بولعانىمەن, قىزمەتىنە كىرىسكەلى بەرى باسىنان داۋ-داماي ارىلماي كەلەدى. سەبەبى اكىم بولىپ تاعايىندالعالى بەرى سوگىس تە الىپ ۇلگەرگەن, ۇستىنەن قىزمەتتىك تەكسەرىس تە جۇرگىزىلگەن. ءتىپتى وبلىس اكىمى ابىلقايىر سقاقوۆ وزىنە باعىنعىسى كەلمەگەن قىزمەتكەردىڭ ءىسىن ءوڭىردىڭ ادەپ جونىندەگى كەڭەسىنىڭ قاراۋىنا جىبەرگەن.
جاقىندا مەملەكەتتىك قىزمەت ىستەرى اگەنتتىگىنىڭ پاۆلودار وبلىسى بويىنشا ادەپ جونىندەگى كەڭەسىنىڭ مۇشەلەرى اقسۋ قالاسىنىڭ اكىمى نۇرجان اشىمبەتوۆتى جانە ونىڭ ۇستىنەن ۇجىمدىق شاعىم تۇسىرگەن قولاستىنداعى مەملەكەتتىك قىزمەتكەرلەردىڭ وي-پىكىرلەرىن تىڭدادى. ۇجىمدىق شاعىمدا قولاستىنداعىلار قالا اكىمىنىڭ دورەكى, ادەپسىز مىنەز-قۇلقىن سىنعا الىپ, ونى مەملەكەتتىك قىزمەتشىنىڭ ەتيكاسىن بۇزدى دەپ ايىپتاعان.
اقسۋ قالاسى اكىمىنىڭ ۇستىنەن تۇسكەن ارىز-شاعىمداردى زەردەلەي كەلە, كەڭەس مۇشەلەرىنىڭ جەتەۋى اكىمدى قىزمەتىنەن بوساتۋعا, ءۇش ادام تارتىپتىك جازا رەتىندە ەسكەرتۋ جاساۋعا, تاعى بىرەۋى سوگىس بەرۋ جونىندە داۋىس بەرگەن. بۇل جونىندە ءوڭىردىڭ الەۋمەتتىك جەلىدەگى رەسمي پاراقشاسىندا مەملەكەتتىك قىزمەت ىستەرى اگەنتتىگى پاۆلودار وبلىسى بويىنشا دەپارتامەنتىنىڭ ءباسپاسوز حاتشىسى اينۇر سادۋاقاسوۆا حابارلادى. ءباسپاسوز قىزمەتكەرىنىڭ مالىمدەۋىنشە, ادەپ جونىندەگى كەڭەس وتىرىسىنىڭ قورىتىندىسى بويىنشا قالا اكىمىن قىزمەتىنەن بوساتۋ تۋرالى ۇسىنىس جاسالعان.
كەڭەس مۇشەلەرى اقسۋ قالاسىنىڭ باسشىسىنا قاتىستى ۇسىنىستارىن ونلاين وتكەن جيىندا ورتاعا سالعان. سىبايلاس جەمقورلىققا قارسى ءىس-قيمىل اگەنتتىگى پاۆلودار وبلىسى بويىنشا دەپارتامەنتىنىڭ باسشىسى ەرنازار بايانعازين نۇرجان اشىمبەتوۆتىڭ اقسۋ قالاسىنىڭ اكىمى لاۋازىمىن اتقارۋعا مورالدىق تۇرعىدان قۇقى جوق دەگەن پىكىرىن ءبىلدىردى.
«قالا اكىمى دەڭگەيىندەگى باسشىنىڭ مۇنداي مىنەز-ق ۇلىق بەلگىلەرى بولعان كەزدە بۇل لاۋازىمدى اتقارۋعا مورالدىق قۇقىعى جوق. بۇل – مەنىڭ جەكە پىكىرىم. سول سەبەپتى اتقاراتىن لاۋازىمىنا سايكەستىگى تۋرالى ماسەلەنى قاراۋدى ۇسىنار ەدىم», دەدى ەرنار بايانعازين.
ادەپ جونىندەگى كەڭەستىڭ توراعاسى, مەملەكەتتىك قىزمەت ىستەرى اگەنتتىگى پاۆلودار وبلىسى بويىنشا دەپارتامەنتىنىڭ باسشىسى ەرجان قارىمساقوۆ جيىن بارىسىندا قالا اكىمى مەن ونىڭ قول استىنداعى قىزمەتكەرلەر اراسىندا سىندارلى ديالوگتىڭ بولماعانىن اتاپ ءوتتى.
ء«بىز بارلىق جاۋاپ بەرۋشىلەردىڭ اراسىندا قايتادان ساۋالداما جۇرگىزىپ, تەكسەرۋ جاسادىق. ويتكەنى نۇرجان كەمەر ۇلى وبلىس اكىمدىگى تەكسەرۋ جۇرگىزۋ كەزىندە كەيبىر مەملەكەتتىك قىزمەتشىلەردىڭ پىكىرى نازاردان تىس قالعانى, تىڭدالماعانى تۋرالى ايتقان بولاتىن. سول سەبەپتى ءبىز بارلىعى اشىق, ءارى وبەكتيۆتى بولۋى ءۇشىن بارلىق قىزمەتكەردىڭ تۇسىندىرمەلەرىن الدىق. قىزمەتكەرلەر ءىس جۇزىندە فاكت بولعانىن كورسەتىپ بەردى. سول سەبەپتى نۇرجان اشىمبەتوۆتىڭ اكىم قىزمەتىندە ودان ءارى بولۋى ورىنسىز دەپ سانايمىن», دەدى ە.قارىمساقوۆ.
ال نۇرجان اشىمبەتوۆ ادەپ جونىندەگى كەڭەستىڭ وتىرىسىندا وزىنە وبلىس اكىمى بەرگەن سوگىستى نەگىزسىز دەپ سانايتىندىعىن ايتقان. ول وزىنە وبلىس اكىمى بەرگەن سوگىس زاڭسىز دەپ, ونىڭ ۇستىنەن سوتقا ارىز بەرگەن. ال قالا باسشىسىنىڭ «مەنىڭ ۇستىمنەن زاڭسىز قىزمەتتىك تەكسەرۋ جۇرگىزىلدى» دەگەن تالاپ-ارىزى سوتتا قابىلدانباعان. ەندى اقسۋ قالاسىنىڭ اكىمىنە سوگىستىڭ زاڭدى, نە زاڭسىز بەرىلگەنىن سوت انىقتايتىن بولادى.
