سۋحۋمي مەملەكەتتىك ۋنيۆەرسيتەتىندە اشىلعان اتالمىش ءدارىسحانا اقىننىڭ بىلتىرعى 175-جىلدىق مەرەيتويى شەڭبەرىندەگى ءىس-شارالاردىڭ ءبىرى رەتىندە گرۋزياداعى قازاقستان ەلشىلىگىنىڭ جانە قازاقستان-گرۋزين مادەني-ەكونوميكالىق بىرلەستىگىنىڭ قولداۋىمەن جابدىقتالعان بولاتىن. ءدارىسحانا ەلىمىز تۋرالى كىتاپتارمەن, مەرزىمدىك باسىلىمدارمەن, كومپيۋتەرلىك تەحنيكامەن قامتىلعان.
قازاقستان ەلشىسى باۋىرجان مۇحامەتجانوۆ ءوز سوزىندە اتالمىش ءدارىسحانانى قازاقستانعا اشىلعان «تەرەزەگە» تەڭەي وتىرىپ, ونىڭ ەلىمىز تۋرالى اقپاراتتىق ورتالىققا اينالاتىنىنا سەنىم ءبىلدىردى.
سالتانات بارىسىندا حاكىم ابايدىڭ ولەڭدەرىن گرۋزين تىلىنە اۋدارعان گرۋزيا جازۋشىلار وداعىنىڭ ءتورايىمى, تانىمال اقىن ماكۆالا گوناشۆيليگە پرەزيدەنت قاسىم-جومارت توقاەۆتىڭ العىس حاتى تابىس ەتىلدى. جينالعاندار گرۋزين وقىرماندارىنىڭ ابايدىڭ ماڭگىلىك مۇراسىمەن ءوز انا تىلىندە تانىسۋ مۇمكىندىگى ەكى دوستاس حالىقتار اراسىنداعى ءوزارا تارتىلىس پەن تۇسىنىستىكتى تەرەڭدەتە تۇسەتىنىنە سەنىم ارتتى.
