وقيعا • 18 مامىر، 2021

بۇرىن ءىستى بولعان پەتروپاۆل تۇرعىنى پوليتسەيگە شابۋىل جاسادى

19 رەت كورسەتىلدى

بۇرىن سوتتالعان پەتروپاۆل تۇرعىنى پوليتسەيگە شابۋىل جاسادى، دەپ حابارلايدى Egemen.kz.

 

16 مامىر كۇنى كەشكە «102» پۋلتىنە گوركي كوشەسىندەگى ۇيلەردىڭ اۋلاسىنداعى بالالار الاڭىندا ماس ەر ادامنىڭ جۇرگەنى تۋرالى حابارلاما كەلىپ تۇسكەن. شاقىرۋ بويىنشا جاقىن ماڭداعى اۆتوپاترۋل مەن ۇلتتىق ۇلان اسكەري قىزمەتشىلەرىنىڭ جاياۋ ناريادى تەكسەرۋگە بارعان.

سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە پاترۋلدىك توپ كەلگەن كەزدە كۇدىكتى قارسىلىق كورسەتكەن، دورەكى سوزدەر ايتىپ، ءتارتىپ ساقشىلارىنىڭ بىرەۋىنە جۇدىرىق الا ۇمتىلعان. پوليتسەيلەرگە باسبۇزاردىڭ قولىنا كىسەن سالۋىنا تۋرا كەلگەن.

تەكسەرىس بارىسىندا قۇقىق بۇزۋشىنىڭ بۇرىن بۇزاقىلىق جاساپ، سۋىق قارۋدى زاڭسىز ساقتاعانى ءۇشىن سوتتالعان 38 جاستاعى قالا تۇرعىنى ەكەنى انىقتالدى. مەديتسينالىق كۋالاندىرۋ ماساڭدىق دەڭگەيىن كورسەتتى.

ەر ادامعا قاتىستى قر اكىمشىلىك قۇقىق بۇزۋشىلىق تۋرالى كودەكسىنىڭ 440-بابى «الكوگولدىك ىشىمدىكتەردى ءىشۋ نەمەسە قوعامدىق ورىندارعا ماساڭ كۇيدە كەلۋ» بويىنشا ماتەريال جينالىپ، سوتقا جولداندى.

«بۇدان بولەك، قر قىلمىستىق كودەكسىنىڭ 380-بابى «بيلىك وكىلىنە قاتىستى كۇش قولدانۋ» بويىنشا ماتەريال جينالدى. ساراپتاما تاعايىندالدى، ونىڭ ناتيجەسى بويىنشا پروتسەسسۋالدىق شەشىم قابىلداناتىن بولادى. قر قك 380-بابى 1-بولىگىنىڭ سانكتسياسى 3 مىڭ ايلىق ەسەپتىك كورسەتكىشكە دەيىنگى مولشەرىندە ايىپپۇل سالۋدى نە 3 جىل مەرزىمگە باس بوستاندىعىنان ايىرۋ جازاسىن كوزدەيتىنىن ەسكە سالامىز. تۇبەگەيلى شەشىمدى قۇزىرلى ورگان شىعارادى»،  دەيدى پەتروپاۆل قالالىق پب باستىعى پوليتسيا پولكوۆنيگى جاندوس مۇقاتوۆ.

كۇدىكتى قايتادان تەمىر تورعا قامالۋى مۇمكىن. ءتارتىپ ساقشىسىنىڭ دەنساۋلىعىنا قانشالىقتى زيان كەلتىرىلگەنىن ساراپتاما قورىتىندىسى انىقتايدى.

سوڭعى جاڭالىقتار

ۇقساس جاڭالىقتار