ايماقتار • 17 مامىر، 2021

ەكولوگيا ءمينيسترى پرەزيدەنت تاپسىرماسىمەن باتىس قازاقستانعا باردى

35 رەت كورسەتىلدى

مەملەكەت باسشىسى قاسىم-جومارت توقاەۆتىڭ تاپسىرماسىمەن قر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ باتىس قازاقستان وبلىسىنا جۇمىس ساپارىمەن كەلدى، دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.

عالىمدارمەن، ەكولوگتارمەن بىرگە جەرگىلىكتى تۇرعىندارمەن كەزدەسىپ، ماسەلەنىڭ شەشۋ جولدارىن تالقىلادى.

جانىبەك، قازتالوۆ، بوكەيوردا، جانعالى اۋداندارى حالقى جايىلىمداردى ساقتاپ قالۋ، سۋ جەتكىزۋ بويىنشا ءوز ۇسىنىستارىن ورتاعا سالدى.

مينيستر ماعزۇم مىرزاعاليەۆ پروبلەماعا ءبىر جاقتى قاراۋعا بولمايتىنىن ايتىپ، ارنايى جۇمىس توبىنىڭ قۇرىلعانى تۋرالى حاباردار ەتتى.

«مەن سىزدەرگە پرەزيدەنت تاپسىرماسى بويىنشا عالىمدارمەن بىرگە ارنايى كەلىپ وتىرمىن. ەكى جاققا دا ءتيىمدى شەشىمدەر قابىلداۋ ءۇشىن ەكولوگيا، اۋىل شارۋاشىلىعى، ءبىلىم جانە عىلىم مينيسترلىكتەرى مەن حالىقارالىق ۇيىمدار، ينستيتۋتتار قۇرامىنا كىرەتىن جۇمىس توبىن قۇرىپ وتىرمىز. قىسقا مەرزىمدە زەرتتەۋلەردى بىتىرۋگە تىرىسامىز»، دەدى مينيستر.

ماعزۇم مىرزاعاليەۆ ماسەلەنىڭ شەشىمىنىڭ ءۇش جولىن اتادى.

ء«بىرىنشىسى، جالپى اۋدانى 343040،1 گا «بوكەيوردا» مەملەكەتتىك تابيعي رەزەرۆاتىن، سونداي-اق جالپى اۋدانى 314505،1 گا اششىوزەك مەملەكەتتىك تابيعي قاۋمالىن قۇرۋ. بۇل بويىنشا بارلىق نەگىزدەمەلەر دايىن. رەزەرۆات قۇرۋ ارقىلى جاڭا جۇمىس ورىندارى دا اشىلادى. ەكىنشىسى، وسى رەزەرۆاتتا گەولوگتاردىڭ ارالاسۋىمەن سۋ كوزدەرىن انىقتاپ، كيىكتەرگە جاساندى سۋات دايىنداۋ. ول تەك كيىككە عانا ەمەس، حالىققا دا پايدالى. ءۇشىنشىسى، كيىكتەردىڭ ورال پوپۋلياتسياسىنىڭ ءبىر بولىگىن جايىقتىڭ وڭ جاعالاۋىن وتكىزۋ ماسەلەسىن قاراستىرامىز»،- دەدى ۆەدومستۆو باسشىسى.

باتىس قازاقستان وبلىسىنىڭ اكىمى عالي ەسقاليەۆ قۇرىلعان جۇمىس توبىنا جەرگىلىكتى شارۋا قوجالىقتارى وكىلدەرى دە كىرەتىنىن، بارلىق زەرتتەۋلەر، شارالار اشىق جۇرەتىنىن جەتكىزدى.

قر بعم زوولوگيا ينستيتۋتىنىڭ تەريولوگيا زەرتحاناسىنىڭ مەڭگەرۋشىسى الەكسەي گراچەۆتىڭ ايتۋىنشا، قازىر كيىك سانىن رەتتەۋ ماسەلەسىن مۇلدەم قوزعاۋعا بولمايدى.

«قانداي دا ءبىر شەشىم قابىلداماس بۇرىن، ماسەلەنى ەگجەي-تەگجەيلى زەردەلەۋ قاجەت. مەملەكەت ءوز ۋاقىتىندا كيىكتەردىڭ سانىن قالپىنا كەلتىرۋ ءۇشىن ۇلكەن رەسۋرستار جۇمسادى. قازىر ول تەك قالپىنا كەلتىرۋ ساتىسىندا، ياعني ول ءالى دە ماكسيمۋمعا جەتكەن جوق. سول سەبەپتى ازىرگە ولاردى اتۋعا رۇقسات بەرىپ، سانىن ازايتۋ تۋرالى ءسوز قوزعاۋعا ەرتە»، دەدى عالىم.

ايتا كەتەيىك، باتىس قازاقستان وبلىسى – ەلىمىزدەگى كيىكتەر ەڭ كوپ شوعىرلانعان ءوڭىر. 2019 جىلعى ساناق بويىنشا بقو اۋماعىندا 217 مىڭ باس كيىك بولعان. 2020 جىلى كوروناۆيرۋس پاندەمياسىنا بايلانىستى ساناق جۇرگەن جوق. 2023 جىلعا دەيىن كيىكتەردى عىلىمي قولدانىستان باسقا ماقساتتا قولدانۋعا زاڭمەن تىيىم سالىنعان.

سوڭعى جاڭالىقتار

بيىل 755 اۋىل اكىمى سايلانادى

قوعام • بۇگىن، 12:15

ۇقساس جاڭالىقتار