جەلەزين اۋدانىنىڭ اكىمى قانات كاشكيروۆ وڭىرلىك كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا مال شارۋاشىلىعىن دامىتۋ تۋرالى باياندادى.
«ۆەسەلوروششين اۋىلدىق وكرۋگىندە «استىق-پۆ» جشس 600 باسقا ارنالعان تاۋارلى ءسۇت فەرماسىن سالۋدى جوسپارلاپ وتىر. قۇنى 1,9 ملرد تەڭگە بولاتىن وسى جوبانى ىسكە اسىرۋ بويىنشا «جول كارتاسى» ازىرلەندى. رۇقسات قۇجاتتارى الىندى», دەدى سپيكەر.
كەشەن قۇرىلىسىن تامىز ايىندا اياقتاپ, قىركۇيەك ايىندا مال اكەلۋ جوسپارلانىپ وتىر. جەلەزين فەرمەرلەرى «سىباعا» مەملەكەتتىك باعدارلاماسىنا بەلسەندى قاتىسۋدا. جىل سوڭىنا دەيىن رەسەي مەن ەۋروپادان 600 باس ءىرى قارا مال, سونداي-اق جەرگىلىكتى شارۋاشىلىقتار جەتكىزە الاتىن ەكى مىڭعا جۋىق ۇساق مال كەلۋى ءتيىس.
سپيكەردىڭ ايتۋىنشا, سوڭعى ءۇش جىلدا اۋداندا اۋىل شارۋاشىلىعى مالدارى سانىنىڭ جانە ءونىم ءوندىرۋ كولەمىنىڭ تۇراقتى ءوسۋ ءۇردىسى ساقتالىپ وتىر.
«مال شارۋاشىلىعى ونىمدەرىن ءوندىرۋدى ورتا ەسەپپەن 4%-عا ارتتىرۋ جوسپارلانىپ وتىر. «سىباعا» باعدارلاماسىنىڭ ارقاسىندا ەت ءوندىرۋ كولەمى 6 مىڭ 693 توننانى قۇراپ, 104%-عا ارتتى, سونداي-اق ءىرى قارا مال ءوسىرۋ بويىنشا 10 شارۋاشىلىق جانە ۇساق مال ءوسىرۋ بويىنشا بەس شارۋاشىلىق اشىلدى», دەپ ناقتىلادى قانات كاشكيروۆ.
2021 جىلى جەلەزيندىكتەر مال مەن قۇس ەتىن ءوندىرۋ, سيىر ءسۇتىن ساۋ, ونىمدىلىكتى ارتتىرۋ ەسەبىنەن اۋىل شارۋاشىلىعى ونىمدەرى ءوندىرىسىنىڭ 3,9% ءوسۋىن قامتاماسىز ەتۋگە نيەتتى.
