سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى ايدوس مامىتتىڭ اقپاراتىنا قاراعاندا, قارجىلاي ىنتالاندىرۋ سىياقىسى دالەلدەنگەن سىبايلاس جەمقورلىق دەرەگى ءۇشىن عانا بەرىلەدى. بىلتىر سىبايلاس جەمقورلىق دەرەكتەرى وڭىردەگى پوليتسيا, دەنساۋلىق ساقتاۋ, ءبىلىم بەرۋ جانە قۇرىلىس ورگاندارىندا ءجيى انىقتالىپتى.
«ماسەلەن, بيىلعى 22 ناۋرىزدا ساعات 16:45-تە سەنىم تەلەفونى ارقىلى اتىراۋ تەمىرجول ستانساسىندا جەلىلىك پوليتسيا ءبولىمى قىزمەتكەرلەرىنىڭ بەكىرە تۇقىمداس بالىقتاردى اكەتۋ دەرەگىمەن قىلمىستىق جاۋاپكەرشىلىككە تارتپاس ءۇشىن 50 مىڭ تەڭگە كولەمىندە پارا تالاپ ەتكەنى تۋرالى حابار ءتۇستى. سول كۇنى وسى دەرەككە بايلانىستى ەكى پوليتسيا قىزمەتكەرى ۇستالدى. كەيىن پوليتسيا قىزمەتكەرلەرى سوتتالدى. ال, حابار بەرگەن ادامعا 70 اەك نەمەسە 204 مىڭ 190 تەڭگە مولشەرىندە اقشالاي سىياقى بەرىلدى. بىلتىر سىبايلاس جەمقورلىق دەرەگى تۋرالى حابارلاعانى ءۇشىن 11 ادام 1,8 ملن تەڭگەدەن استام قارجىلاي سىياقى الدى. وسى جىلدىڭ ءۇش ايىندا وڭىردەگى وسىنداي حابارلامالار ءۇشىن 4 ادام جالپى سوماسى 700 مىڭ تەڭگەدەن استام سىياقىعا يە بولدى», دەدى ايدوس مامىت.
