قوعام • 12 مامىر، 2021

شىعىس قازاقستاندا كەيىنگى ءۇش جىلدا 24 بالا تەرەزەدەن قۇلاپ قايتىس بولدى

4 رەت كورسەتىلدى

شىعىس قازاقستان وبلىسىندا كەيىنگى ءۇش جىلدا 24 بالا تەرەزەدەن قۇلاپ كوز جۇمدى، دەپ حابارلايدى Egemen.kz

شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك، ءوڭىر بويىنشا بالالاردىڭ تەرەزەدەن قۇلاپ كەتۋ جاعدايلارى از تىركەلىپ جاتقان جوق. وتكەن جىلى 9، 2021 جىلدىڭ باسىنان 1 جازاتايىم وقيعا بولعان.

«2018-2021 جىلدار ارالىعىندا وسىنداي 24 جاعداي تىركەلگەن. قايعىلى وقيعالاردىڭ نەگىزگى سەبەپتەرى – بالالاردى قاراۋسىز قالدىرۋ جانە تەرەزەدەگى قاۋىپسىزدىكتى قامتاماسىز ەتەتىن تەمىر توردىڭ بولماۋى. تالداۋ بارىسىندا انىقتالعانداي، مارقۇم بولعاندار: 1 جاستان 3 جاسقا دەيىنگى – 7 بالا، 4 جاستان 6 جاسقا دەيىنگى – 10، 7 جاستان 12 جاسقا دەيىنگى – 6 جانە 13 جاستان 16 جاسقا دەيىنگى – 1 بالا»، دەپ حابارلادى ۆەدومستۆو وكىلدەرى.

ماسەلەن، سەمەي قالاسىندا وسى جىلدىڭ 8 مامىرىندا ءۇشىنشى قاباتتا ورنالاسقان پاتەردىڭ تەرەزەسىنەن قۇلاعان بالا اۋرۋحاناعا جاتقىزىلدى. جازاتايىم وقيعالار نەگىزىنەن بيىك تۇرعىن ۇيلەر كوپ شوعىرلانعان وبلىستىڭ ءىرى قالالارىندا تىركەلگەن. دارىگەرلەردىڭ ايتۋىنشا، تەرەزەدەن قۇلاعان بالالاردىڭ كوبىسىندە قول-اياقتارى سىنىپ، مي جاراقاتىن الىپ، جۇيكە جۇيەسى زاقىمدالادى. مۇنىڭ سالدارى پسيحولوگيالىق جاراقاتقا اينالۋى مۇمكىن.

سونداي-اق بالالاردىڭ مۇگەدەك بولىپ قالۋ ىقتيمالدىعى دا جوعارى.

«وسىنداي جازاتايىم وقيعالار اتا-انالار ۇلكەن بالالارعا كىشكەنتايلارىن قاراۋدى تاپسىرعان كەزدە ورىن الىپ جاتادى. ءتىپتى بەس جاسار بالاعا بىرگە ەندى تولعان ءىنى-قارىنداسىن باقىلاۋ مىندەتى جۇكتەلگەن كەزدەر دە بولدى. بۇل مۇلدەم دۇرىس ەمەس. بالا ەرەسەكتەر سياقتى جاۋاپكەرشىلىكتى سەزىنە المايدى. ول ءبىر نارسەگە الاڭداپ، بۇلدىرشىنگە باس-كوز بولۋدى ۇمىتىپ كەتەدى» دەلىنگەن حابارلامادا.

سونىمەن قاتار دەپارتامەت وكىلدەرى بالالاردىڭ تەرەزەدەن قۇلاۋىن بولدىرماۋ ءۇشىن وتباسىلارعا موسكيت تورلاردى ورناتپاۋعا كەڭەس بەردى.

«بالالار موسكيت تورىنا سۇيەنىپ، تەرەزەدەن قۇلاپ كەتۋى مۇمكىن. بۇنداي تور بۇلدىرشىندەردى قۇلاپ كەتۋدەن مۇلدە قورعامايدى. كەرىسىنشە، موسكيت تور قايعىلى جاعدايعا ىقپال ەتەدى. ويتكەنى بالا ءوزىن قاۋىپسىز سەزىنىپ، تەرەزەگە جاقىنداپ وعان سۇيەنەدى. كوبىنەسە اتا-انالاردىڭ وزدەرى بالانى تەرەزەگە قويىپ، بىردەڭە كورسەتەدى. بۇلاي ىستەمەۋ كەرەك»، دەدى شقو تجد توتەنشە جاعدايلاردىڭ الدىن الۋ باسقارماسىنىڭ باستىعى الەكسەي شتىكەل.

سوڭعى جاڭالىقتار

ستۋدەنتتەردىڭ ستيپەندياسى كوبەيەدى

ايماقتار • 11 ماۋسىم، 2021

اقتوبە وبلىسىنا باس يمام تاعايىندالدى

تاعايىنداۋ • 11 ماۋسىم، 2021

ۇقساس جاڭالىقتار