ەلوردا • 11 مامىر، 2021

ەلوردادا 181 مىڭعا جۋىق ادامعا ۆاكتسينا سالىندى

13 رەت كورسەتىلدى

نۇر-سۇلتان قالاسىندا كوروناۆيرۋسقا قارسى ۆاكتسينانى 181 مىڭعا جۋىق ادام الدى، دەپ حابارلايدى Egemen.kz.

ونىڭ ىشىندە ۆاكتسينانىڭ 1-كومپونەنتىن 128 مىڭ 700، 2-كومپونەنتىن 52 مىڭنان استام ادام الدى.

قازىرگى ۋاقىتتا ۆاكتسيناتسيا پۋنكتەرى مەديتسينالىق ۇيىمداردا، ساۋدا كەشەندەرىندە اشىلعان. وسىلايشا، ەگۋ كابينەتتەرىنىڭ سانى جىلجىمالى بريگادالار ارقىلى ءۇش ەسە ۇلعايتىلدى.

قالا بويىنشا ساۋدا ورتالىقتارى مەن ساۋدا كەشەندەرىندەگى پۋنكتەر سانى — 9. ولار «Mega Silk Way»، «Keruen»، «حان شاتىر» جانە «ابۋ-دابي پلازا» ساۋدا، ويىن-ساۋىق ورتالىقتارى، «ازيا پارك» جانە «بيگ شانحاي» ساۋدا كەشەندەرى، ورتالىق بازار، «الەم» جانە «استانالىق»ساۋدا ورتالىقتارى. اتالعان ەگۋ ايماقتارىندا شامامەن 14 000 ازامات ۆاكتسينالاندى.

ۆاكتسيناتسيا پۋنكتەرىنىڭ كەڭەيۋىنە بايلانىستى مەديتسينالىق-سانيتارلىق العاشقى كومەك (مساك) ۇيىمدارىنىڭ جۇمىس ۋاقىتى ساعات 8:00-دەن 22:00-گە دەيىن قىسقارتىلدى، سوو ءۇشىن جۇمىس ءتارتىبى وزگەرىسسىز قالادى — ساعات 10:00-دەن 22:00-گە دەيىن.

سونداي-اق قالالىق مساك ۇيىمدارىنا QazVac وتاندىق ۆاكتسيناسىنىڭ قالعان دوزالارى تاراتىلدى. بۇل دوزالار ءبىرىنشى كەزەڭدە العان ازاماتتاردىڭ جارتىسىن ۆاكتسينالاۋعا ارنالعان.

ەسكە سالا كەتەيىك، ءساۋىر ايىنىڭ سوڭىندا ەلورداعا 6 مىڭ قازاقستاندىق پرەپارات كەلىپ تۇسكەن بولاتىن.

ازاماتتاردى ەگۋ ءۇشىن رەسەيلىك «سپۋتنيك» ۆاكتسيناسىنىڭ 90 مىڭنان استام دوزاسى بار.

قىتايدان جەتكىزىلگەن 7 400 ۆاكتسينانىڭ قازىر 6 700-گە جۋىق دوزاسى بار. قوعامدىق دەنساۋلىق ساقتاۋ باسقارماسىنىڭ مالىمەتىنشە، جاقىندا باسقارما قويمالارىنا Sinofarm Hayat-Vak ۆاكتسيناسىنىڭ تاعى 7 400 دوزاسى كەلىپ ءتۇستى.

پرەپاراتتاردىڭ دوزالارىن جەتكىزۋ كەستەگە سايكەس، سونداي-اق «سق-فارماتسيا» جانە قر دسم ءتارتىبى بويىنشا جۇزەگە اسىرىلادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز