قازاقستان • 09 مامىر، 2021

قاسىم-جومارت توقاەۆ قازاقستاندىقتاردى جەڭىس كۇنىمەن قۇتتىقتادى

45 رەت كورسەتىلدى

پرەزيدەنت قاسىم-جومارت توقاەۆ قازاقستاندىقتاردى جەڭىس كۇنىمەن قۇتتىقتادى. بۇل تۋرالى اقوردانىڭ ءباسپاسوز قىزمەتى حابارلادى. Egemen.kz وقىرمان نازارىنا قۇتتىقتاۋ ءماتىنىن ۇسىنادى.

قىمباتتى وتانداستار!

بارشاڭىزدى ۇلى جەڭىس كۇنىمەن شىن جۇرەكتەن قۇتتىقتايمىن!

بۇل مەيرام – بەيبىت ءومىرىمىز، ازاتتىعىمىز بەن جارقىن بولاشاعىمىز ءۇشىن فاشيست باسقىنشىلارىنا قارسى سۇراپىل سوعىستا جەڭىسكە جەتكەن باتىرلارىمىزدىڭ ەرلىگى مەن داڭقىنىڭ سيمۆولى.

ۇلى وتان سوعىسى مايدانىنا ميلليوننان استام قازاقستاندىق اتتانىپ، ولاردىڭ تەڭ جارتىسى جەڭىس جولىندا قازا تاپتى. 

ادامزات تاريحىندا تەڭدەسسىز ەرلىك جاساعان اكەلەرىمىز بەن انالارىمىزدىڭ قاجىماس قايسارلىعى، ەرەن ەڭبەگى جانە كوزسىز قاھارماندىعى حالقىمىزدىڭ جادىندا ماڭگى ساقتالادى.            

بيىلعى جەڭىس كۇنىن بىزبەن بىرگە 665 مايدانگەر مەن 100 مىڭعا جۋىق تىل ەڭبەككەرى قارسى الۋدا. ولاردىڭ ەشقايسىسى مەملەكەتتىڭ قولداۋى مەن قامقورلىعىنان، قوعامنىڭ سىي-قۇرمەتىنەن تىس قالمايدى.

سوعىس جانە تىل ارداگەرلەرىنە، بارشا قازاقستاندىقتارعا بەيبىت تىرشىلىك، زور دەنساۋلىق، باق-بەرەكە تىلەيمىن!  

جەڭىس كۇنى قۇتتى بولسىن!

سوڭعى جاڭالىقتار

بيىل 755 اۋىل اكىمى سايلانادى

قوعام • بۇگىن، 12:15

ۇقساس جاڭالىقتار