پرەزيدەنت • 08 مامىر، 2021

مەملەكەت باسشىسىنىڭ اتىنا جەڭىس كۇنىنە وراي كەلىپ تۇسكەن قۇتتىقتاۋ جەدەلحاتتارى

23 رەت كورسەتىلدى

قاسىم-جومارت توقاەۆتىڭ اتىنا ۇلى جەڭىستىڭ 76 جىلدىعىنا وراي شەت مەملەكەتتەردىڭ باسشىلارىنان قۇتتىقتاۋ جەدەلحاتتارى كەلىپ ءتۇسىپ جاتىر، دەپ حابارلايدى Egemen.kz اقورداعا سىلتەمە جاساپ.

رەسەي پرەزيدەنتى ۆلاديمير پۋتينء وزىنىڭ قۇتتىقتاۋ حاتىندا اكەلەرىمىز بەن اتالارىمىزدىڭ، سانسىز قۇربانداردىڭ ەرلىگىن ەسىمىزدە ساقتاۋ، ارداگەرلەرىمىزگە قامقورلىق كورسەتىپ، ولارعا ءاردايىم كوڭىل ءبولۋ ءبىزدىڭ ورتاق پارىزىمىز دەپ جازعان. ۆلاديمير پۋتين قاتال سوعىس جىلدارىندا شىڭدالعان باۋىرلاس دوستىق پەن ءوزارا قولداۋ داستۇرلەرى رەسەي مەن قازاقستان اراسىنداعى ستراتەگيالىق ارىپتەستىك پەن وداقتاستىقتىڭ سەنىمدى نەگىزى بولىپ تابىلاتىنىن ايتقان.

وزبەكستان پرەزيدەنتى شاۆكات ميرزيوەۆتىڭ جەدەلحاتىندا 9 مامىر ءبىزدىڭ حالىقتارىمىزدىڭ جەڭىمپاز باتىرلىعى مەن ەرلىگىن، ولاردىڭ بەيبىتشىلىك، بوستاندىق جانە ءوزارا ىنتىماقتاستىق ءۇشىن قاھارماندىق كۇرەسىن بىلدىرەتىن ايتۋلى كۇن دەلىنگەن.

قىرعىزستان پرەزيدەنتى سادىر جاپاروۆء بىزدىڭ حالىقتارىمىزدىڭ ومىرىندە ەرەكشە ورىن الاتىن جەڭىس كۇنى ماڭگى ەرلىك پەن بىرلىكتىڭ سيمۆولى بولىپ قالا بەرەتىنىن اتاپ وتكەن.

تاجىكستان پرەزيدەنتى ەمومالي راحمونء وزىنىڭ قۇتتىقتاۋىندا 9 مامىر مەملەكەتتەرىمىزدىڭ قازىرگى تاريحىنداعى ايتۋلى داتا ەكەنىنە توقتالىپ، بۇل كۇنى جاۋعا قارسى جانقيارلىقپەن سوعىسقان بابالارىمىزدىڭ كوزسىز ەرلىكتەرىن، باتىلدىعى مەن وتانسۇيگىشتىگىن جانە قايسارلىعىن ەسكە الامىز دەپ اتاپ وتكەن.

تۇرىكمەنستان پرەزيدەنتى گۋربانگۋلى بەردىمۇحامەدوۆ جەدەلحاتىندا بابالارىمىزدىڭ ۇلى ەرلىگى ماڭگى ۇمىتىلمايتىنىنا جانە ونىڭ ەكى ەل اراسىنداعى دوستىق قاتىناستار مەن جان-جاقتى ىنتىماقتاستىقتى ودان ءارى نىعايتۋدىڭ بەرىك نەگىزى بولاتىنىنا سەنىم بىلدىرگەن.

ازەربايجان پرەزيدەنتى يلحام اليەۆ  ۇلى وتان سوعىسى جىلدارىنداعى اۋىر سىناققا ابىرويمەن توتەپ بەرگەن حالىقتارىمىزدىڭ دوستىق ءداستۇرى مەن كورسەتكەن ءوزارا قولداۋى ەكى مەملەكەت اراسىنداعى قارىم-قاتىناستاردىڭ ودان ءارى دامىپ، نىعايۋىنىڭ مىقتى ىرگەتاسى بولاتىنىن جەتكىزگەن.

بەلارۋس پرەزيدەنتى الەكساندر لۋكاشەنكوء وز جەدەلحاتىندا باتىر بابالاردىڭ رۋحىنا تاعزىم ەتۋ ولاردىڭ ەرلىكتەرىنە كورسەتكەن قۇرمەتىمىز ەكەنىن اتاپ ءوتىپ،  مۇنىڭ ءوزارا ىنتىماقتاستىقتى ارتتىرۋدىڭ بەرىك نەگىزى بولاتىنىن جانە قازىرگى الەمنىڭ سىن-قاتەرلەرىنە ءتيىمدى توتەپ بەرۋگە مۇمكىندىك بەرەتىنىن ايتقان.

ارمەنيا پرەزيدەنتى ارمەن ساركيسيان ەكى ەل حالىقتارىنىڭ سوعىس كەزىندە شىڭدالعان دوستىعى ارمەنيا مەن قازاقستان اراسىنداعى بايلانىستاردى ءارى قاراي دامىتۋعا قىزمەت ەتە بەرەتىنىنە سەنىم بىلدىرگەن.

ارمەنيا پرەمەر-ءمينيسترىنىڭ مىندەتىن اتقارۋشى نيكول پاشينيانء وز قۇتتىقتاۋىندا ورتاق قاھارماندارىمىزدىڭ ەسىمدەرىن ۇلىقتاۋ ارمەنيا مەن قازاقستان اراسىنداعى ىنتىماقتاستىقتى ەكى حالىقتىڭ يگىلىگى ءۇشىن دامىتۋدىڭ باستى باعدارى بولادى دەپ سەنەتىنىن ايتقان.

جەڭىس كۇنى مەرەكەسىنە وراي رەسەي فەدەراتسياسى قاۋىپسىزدىك كەڭەسى توراعاسىنىڭ ورىنباسارى دميتري مەدۆەدەۆ، تمد اتقارۋ كوميتەتىنىڭ توراعاسى - اتقارۋشى حاتشىسى سەرگەي لەبەدەۆ، ۇقشۇ باس حاتشىسى ستانيسلاۆ زاس، ەۋرازيالىق ەكونوميكالىق كوميسسيا القاسىنىڭ توراعاسى ميحايل مياسنيكوۆيچ، ەۋرازيالىق دامۋ بانكىنىڭ باسقارما توراعاسى نيكولاي پودگۋزوۆ جانە بايقوڭىر قالاسى اكىمشىلىگىنىڭ باسشىسى كونستانتين بۋسىگين قۇتتىقتاۋ جەدەلحاتتارىن جولدادى.

جەدەلحاتتار ءالى دە تولاسسىز كەلىپ تۇسۋدە.

سوڭعى جاڭالىقتار

بيىل 755 اۋىل اكىمى سايلانادى

قوعام • بۇگىن، 12:15

ۇقساس جاڭالىقتار