«ارميا مەن كۇش قۇرىلىمدارى ەلدىڭ ەگەمەندىگى مەن ۇلتتىق قاۋىپسىزدىكتىڭ باستى كەپىلى بولىپ تابىلادى. الەمدەگى جاھاندىق كاتاكليزمدەر مەن گەوستراتەگيالىق قۇبىلمالى جاعدايدا اسكەري قىزمەتشىلەردىڭ ءرولى بىرنەشە ەسە ارتادى. سىزدەر تاۋەلسىزدىگىمىزدى قورعاۋ ىسىندە بەكەم تۇرسىزدار. سىزدەردىڭ كۇش-جىگەرلەرىڭىزدىڭ ارقاسىندا قازاقستان وڭىرلىك جانە حالىقارالىق تۇراقتىلىقتىڭ دونورى رەتىندە تانىلدى. ءبىزدىڭ اسكەري قىزمەتشىلەرىمىز بىرىككەن ۇلتتار ۇيىمىنىڭ بىتىمگەرشىلىك ميسسياسى شەڭبەرىندە قويىلعان مىندەتتەردى تابىستى ورىندايدى», دەدى مەملەكەت باسشىسى.
وسى ورايدا پرەزيدەنت «جۋسان» ارنايى وپەراتسياسىنىڭ ءمىنسىز ءوتۋى ۇلتتىق قاۋىپسىزدىك ورگاندارى قىزمەتكەرلەرىنىڭ جوعارى كاسىبيلىگىنەن دەپ اتاپ ءوتتى.
«پوليتسيا مەن پروكۋراتۋرا قىزمەتى بىرتىندەپ جەتىلدىرىلىپ كەلەدى. مەنىڭ تاپسىرمام بويىنشا قۇقىق قورعاۋ جۇيەسىن رەفورمالاۋ باستالدى. ونىڭ ءتيىمدى ىسكە اسىرىلۋى بيلىك ينستيتۋتتارىنا دەگەن سەنىم دەڭگەيىن ەداۋىر ارتتىرىپ, قوعامداعى قۇقىقتىق ءتارتىپ پەن الەۋمەتتىك ادىلەتتىلىكتى نىعايتۋدى قامتاماسىز ەتەدى. ەلدىڭ قورعانىس قابىلەتىن كۇشەيتۋ ءۇشىن مەملەكەت قارۋلى كۇشتەردىڭ جاۋىنگەرلىك ازىرلىگى مەن جاراقتاندىرىلۋىنا ءجىتى نازار اۋدارىپ وتىر. اسكەرلەرگە جۇيەلى نەگىزدە قارۋ-جاراق پەن اسكەري تەحنيكانىڭ ەڭ زاماناۋي ۇلگىلەرى كەلىپ ءتۇسىپ جاتىر. اسكەري قىزمەتشىلەردىڭ, قۇقىق قورعاۋ ورگاندارى قىزمەتكەرلەرىنىڭ جالاقىسى مەن الەۋمەتتىك قورعالۋ دەڭگەيى كەزەڭ-كەزەڭىمەن ارتىپ كەلەدى», دەدى قاسىم-جومارت توقاەۆ.
