قوعام • 06 مامىر، 2021

Nur Otan «ديپلوممەن – اۋىلعا!» باعدارلاماسىن سىنادى

43 رەت كورسەتىلدى

Nur Otan-دا جاستارعا ارنالعان مەملەكەتتىك باعدارلامالاردى جۇزەگە اسىرۋدىڭ كەمشىلىكتەرى ايتىلدى، دەپ حابارلايدى Egemen.kz.

«ديپلوممەن – اۋىلعا!» جانە «سەرپىن» مەملەكەتتىك باعدارلامالارىن جۇزەگە اسىرۋداعى ءتۇيىندى ماسەلەلەردى «Nur Otan» پارتياسى جانىنداعى جاستاردى قولداۋ جونىندەگى جاڭا رەسپۋبليكالىق قوعامدىق كەڭەس مۇشەلەرى تالقىلادى.

وتىرىس بارىسىندا ۇلتتىق ەكونوميكا ۆيتسە-ءمينيسترى الىشەر ابدىقادىروۆ حابارلاعانداي، «ديپلوممەن – اۋىلعا!» جوباسىن ىسكە اسىرۋ ناتيجەسىندە 2009-2020 جىلدار ارالىعىندا 77 مىڭنان استام مامان 11،5 ملرد تەڭگە سوماسىندا كوتەرمە جاردەماقى السا، ال 36،6 مىڭ مامان 105،3 ملرد تەڭگە سوماسىندا تۇرعىن ۇيگە بيۋدجەتتىك نەسيەگە قول جەتكىزگەن. بۇل رەتتە ءبىلىم بەرۋ سالاسىنىڭ – 70% جانە دەنساۋلىق ساقتاۋ سالاسىنىڭ – 21% ماماندارى قامتىلعان.

كەڭەس توراعاسى، ءماجىلىس دەپۋتاتى ءمادي احمەتوۆتىڭ ايتۋىنشا، جاس مامانداردىڭ مۇددەلەرىن ەسكەرە وتىرىپ، باعدارلاماعا قاتىسۋ شارتتارىنىڭ بىرنەشە رەت قايتا قارالعانىنا قاراماستان، جوسپارلانعان كورسەتكىشتەرگە قول جەتكىزىلمەگەن.

«بۇل جوبالار باستاپقىدا قالا مەن اۋىل اراسىنداعى ءتۇرلى سالالار بويىنشا الشاقتىقتى تەڭەستىرە وتىرىپ، بار پروبلەمالار كەشەنىن شەشۋگە ءتيىس ەدى. بىراق وڭىرلەردەگى احۋال سول دەڭگەيدە قالىپ وتىر، ايتارلىقتاي وزگەرىستەر جوق»، دەدى ول.

ءوز كەزەگىندە «Jas Otan» جق-نىڭ توراعاسى نۇرجان جەتپىسباەۆ اۋىلدىق جەرلەردە كادر تاپشىلىعى ماسەلەسى وتكىر كۇيىندە قالىپ وتىرعانىن العا تارتتى. بۇگىنگى تاڭدا اگروونەركاسىپتىك كەشەن سالاسىندا 2،8 مىڭ مامان جەتىسپەيدى.

«ەگەر جىل سايىن مەملەكەتتىك گرانتتار بويىنشا اگرارلىق ماماندىق العان تۇلەكتەردىڭ تەك 30%-ى عانا اۋىلدىق جەرگە جۇمىسقا ورنالاساتىنىن ەسكەرسەك، وسى ماقساتقا بيۋدجەتتەن بولىنگەن 7 ملرد تەڭگەگە جۋىق قاراجات ءتيىمسىز پايدالانىلىپ وتىر. «ديپلوممەن – اۋىلعا!» باعدارلاماسىن ىسكە اسىرۋداعى كەمشىلىكتەردىڭ ءبىرى – جاس ماماندارعا بيۋدجەتتىك نەسيە قاراجاتىن ءبولۋ كەزىندەگى بيۋروكراتيا»،  دەپ اتاپ ءوتتى ول.

وسىعان بايلانىستى پارتيانىڭ جاستار قاناتىنىڭ باسشىسى ءماجىلىستىڭ جاس دەپۋتاتتارى اراسىنداعى كەڭەس مۇشەلەرىنە كوتەرمە جاردەماقى تولەۋدەن جانە تۇرعىن ءۇي ساتىپ الۋعا نەسيە بەرۋدەن نەگىزسىز باس تارتۋعا قاتىستى قۇقىقبۇزۋشىلىقتاردى تەكسەرۋ ءۇشىن باس پروكۋراتۋراعا دەپۋتاتتىق ساۋال جولداۋدى ۇسىندى. جەرگىلىكتى جەرلەردە «ديپلوممەن – اۋىلعا!» جانە «سەرپىن» باعدارلامالارىن  ىسكە اسىرۋدىڭ مونيتورينگىنە «Nur Otan» پارتياسىنىڭ جاس دەپۋتاتتارىنىڭ كورپۋسى دا قوسىلادى.

«سەرپىن» باعدارلاماسى تۋرالى ايتا كەلە، ءبىلىم جانە عىلىم ۆيتسە-ءمينيسترى شولپان كارينوۆا بولىنگەن مەملەكەتتىك تاپسىرىس تولىق كولەمدە يگەرىلمەيتىنىن ايتتى. ول گرانتتاردىڭ يگەرىلمەۋىنىڭ نەگىزگى سەبەپتەرى رەتىندە ءبىلىم العان جەرىندە مىندەتتى جۇمىسپەن وتەۋ تالابىنىڭ بولۋىن، باعدارلاما تۇلەكتەرىنىڭ جۇمىسقا ورنالاساتىنىنا كەپىلدىك بەرىلمەۋىن، جەرگىلىكتى اتقارۋشى ورگاندار مەن جۇمىس بەرۋشىلەردىڭ جوو-مەن جۇمىسقا ورنالاستىرۋ ماسەلەلەرى بويىنشا ءوزارا ءىس-قيمىلىنىڭ ناشارلىعىن، باعدارلاما تۇلەكتەرىندە تۇرعىن ءۇيدىڭ بولماۋىن جانە ت. ب. اتادى.

«2019 جىلى «سەرپىن» جوباسى بويىنشا گرانتتاردىڭ 52%-ى وعان قاتىسۋعا نيەت بىلدىرگەندەردىڭ بولماۋىنا بايلانىستى سۇرانىسسىز قالدى. «سەرپىن» تۇلەكتەرىنىڭ تورتتەن ءبىر بولىگى عانا ءبىلىم العان ايماعىندا تۇراقتايدى. جىل سايىن جوبانى جاقسارتۋ جانە جەتىلدىرۋ بويىنشا بىرقاتار شارالار قابىلدانادى، بيۋدجەت ۇلعايادى، بىراق تيىمدىلىك بايقالمايدى»، دەپ اتاپ ءوتتى ءمادي احمەتوۆ.

تۇتىنۋشىلاردىڭ قۇقىقتارىن قورعاۋ كواليتسياسىنىڭ توراعاسى مۇرات ابەنوۆ تە قازىرگى تاڭدا بۇل باعدارلاماعا دەگەن جاستاردىڭ قىزىعۋشىلىعى تومەندەگەنىن تىلگە تيەك ەتتى.

«باستاپقىدا باعدارلاماعا قىزىعۋشىلىق جوعارى بولدى. قازىر ەشكىم بارعىسى كەلمەيدى، قۇجات تاپسىرمايدى. ماسەلە نەدە؟ باعدارلاما بويىنشا كەلگەن جاستارعا كوتەرمە قارجى بەرىلەدى، قوسىمشا شاكىرتاقى قاراستىرىلادى. الايدا، بىتىرگەن سوڭ مىندەتتى تۇردە ءۇي، جۇمىس تاۋىپ بەرەمىز دەگەن ۋادە مەملەكەت تاراپىنان ورىندالمادى»، دەدى ول.

سونىمەن قاتار، ءماجىلىس دەپۋتاتى جۇلدىز سۇلەيمەنوۆا كاسىپتىك باعدار بەرۋدەگى كەمشىلىكتەرگە، جاستارعا ول تۋرالى اقپاراتتىڭ جەتپەۋىنە جانە وسى جوبالار تۋرالى ورتالىقتاندىرىلعان اقپاراتتىڭ جوقتىعىنا نازار اۋداردى. ونىڭ ايتۋىنشا، «سەرپىن» باعدارلاماسىندا مەديتسينا ماماندارىن دايارلايتىن باعىتى جوق.

وتىرىس قورىتىندىسىندا كەڭەس ءتيىستى مەملەكەتتىك باعدارلامالاردىڭ ىسكە اسىرىلۋىن جاقسارتۋ بويىنشا بىرقاتار ۇسىنىمدار ازىرلەدى، ولار ۋاكىلەتتى ورگاندارعا جولداناتىن بولادى.

سوڭعى جاڭالىقتار

عارىشتان انىقتالعان قوقىستار

ەكولوگيا • بۇگىن، 08:24

ۆيرۋس جۇقتىرۋ توقتاماي تۇر

كوروناۆيرۋس • بۇگىن، 08:16

ءورت سوندىرگەن وجەتتەر

ايماقتار • بۇگىن، 08:12

ەرلىككە بەرگىسىز ەڭبەك

قوعام • بۇگىن، 08:09

جاساندى جۇرەك سالىندى

الەم • بۇگىن، 08:02

نۇروتاندىقتاردىڭ ايقىن جەڭىسى

ساياسات • بۇگىن، 07:43

شامانىڭ ءانى

ونەر • كەشە

سوتتالعان جىرلار

ادەبيەت • كەشە

9 اي «تولعاتقان» 9 پايىز

ەكونوميكا • كەشە

ۇقساس جاڭالىقتار