ايماقتار • 04 مامىر، 2021

بيىل نۇر-سۇلتاندا جەڭىلدىكپەن بەرىلەتىن 10 مىڭ پاتەر سالىنادى

65 رەت كورسەتىلدى

نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا جەڭىلدىكپەن سالىناتىن پاتەرلەر سانى كوبەيەتىنىن ءمالىم ەتتى، دەپ حابارلايدى Egemen.kz.

«ەلوردانىڭ ءار اۋدانىن «نۇر-سۇلتان – جايلى قالا» ماستەر-جوسپارى اياسىندا ورتالىقتاندىرىپ دامىتۋدامىز. سونىمەن قاتار قالا تۇرعىندارىنا قولايلى جاعداي جاساۋ ءۇشىن اباتتاندىرۋعا، قوعامدىق كەڭىستىكتەر (ساياباقتار، سكۆەرلەر، بۋلۆارلار، اۋلالار) اشۋعا جانە كوگالداندىرۋعا ەرەكشە كوڭىل بولەمىز.

بۇگىن قولجەتىمدى جەڭىلدىكپەن بەرىلەتىن تۇرعىن ءۇي قۇرىلىسىنىڭ بارىسىمەن تانىستىم. تۇرعىن ءۇي كەشەندەرى الماتى اۋدانىندا («مەترو» جاعىندا) ورنالاسقان. اۋماقتى اباتتاندىرۋعا، كوگالداندىرۋعا، تۇرعىن ءۇي كەشەنىنە كىرۋ توپتارىن قۇرۋعا ەرەكشە نازار اۋدارا وتىرىپ، قۇرىلىس ساپاسىن ءبىرىنشى ورىنعا قويۋدى تاپسىردىم»، دەدى التاي كولگىنوۆ.

سونداي-اق مەملەكەت باسشىسىنىڭ تاپسىرماسى بويىنشا جەڭىلدىكپەن بەرىلەتىن تۇرعىن ءۇي سانىن ارتتىرۋ بويىنشا جۇيەلى جۇمىس جۇرگىزىپ جاتقانىن ايتتى.

«ەگەر 2018 جىلى 1800، 2019 جىلى 2900 پاتەر سالىنىپ، پايدالانۋعا بەرىلسە، 2020 جىلى بۇل كورسەتكىش 7 مىڭ الەۋمەتتىك پاتەرگە ۇلعايتىلدى. وسى جىلى كورسەتكىشتى 10 مىڭ قولجەتىمدى جەڭىلدىكپەن بەرىلەتىن تۇرعىن ۇيگە دەيىن جەتكىزۋدى جوسپارلاپ وتىرمىز.

بۇدان ءارى جاڭا ۇيلەر مەن الەۋمەتتىك نىسانداردى سۋمەن، كارىزبەن جانە جىلۋمەن قامتاماسىز ەتۋ ءۇشىن 3-جەو (1-كەزەك، جىلۋمەن جابدىقتاۋ)، كتق-2 (كارىزدىك تازارتۋ قۇرىلىستارى) جانە سج-3 (سۋمەن جابدىقتاۋ) جوبالاۋىن، قۇرىلىسىن جۇرگىزەمىز»، دەپ جازدى قالا اكىمى.

سوڭعى جاڭالىقتار

ۇقساس جاڭالىقتار