مەملەكەت باسشىلارى پاندەميادان كەيىنگى كەزەڭدە ەكىجاقتى ەكونوميكالىق بايلانىستاردىڭ جوعارى قارقىنىن ساقتاۋدىڭ ماڭىزدىلىعىن, سونداي-اق, بىرلەسكەن جاڭا جوبالار مەن باستامالاردى جۇزەگە اسىرۋ قاجەت ەكەنىن ايتتى.
وسىعان بايلانىستى ءوزارا ساۋدا-ساتتىق كولەمىن ۇلعايتۋ, ەكسپورتتالاتىن تاۋار تۇرلەرىن ءارتاراپتاندىرۋ, ەكى ەلدىڭ بيزنەسى مەن وڭىرلەرى اراسىنداعى تىكەلەي قاتىناستاردى جولعا قويۋ ءۇشىن ۇكىمەتتەردىڭ ىقپالداستىعىن جانداندىرۋعا دايىندىق ماسەلەسى ناقتىلاندى.
ىنتىماقتاستىق جونىندەگى ۇكىمەتارالىق كوميسسيانىڭ كەزەكتى وتىرىسىن جۋىق ارادا وتكىزۋ تۋرالى ۋاعدالاستىققا قول جەتكىزىلدى.
تاراپتار COVID-19 پاندەمياسىمەن كۇرەسۋ ءۇشىن قابىلدانىپ جاتقان شارالار, سونىڭ ىشىندە, ەكى ەل ازاماتتارىن ۆاكتسينالاۋعا قاتىستى ءىس-قيمىلدار جايىندا اقپاراتتارمەن الماستى.
جوعارى ەۋرازيالىق ەكونوميكالىق كەڭەستىڭ بيىلعى مامىردا وتەتىن وتىرىسىن ەسكەرە وتىرىپ, قاسىم-جومارت توقاەۆ پەن الەكساندر لۋكاشەنكو كۇن تارتىبىندەگى نەگىزگى ينتەگراتسيالىق ماسەلەلەردى تاعى دا ءبىر مارتە پىسىقتادى.
ەكى ەلدىڭ كوشباسشىلارى ءبىر-ءبىرىن الداعى كەلە جاتقان مامىر مەرەكەلەرىمەن قۇتتىقتاپ, قازاقستان مەن بەلارۋس حالىقتارىنىڭ بەرەكەلەرى ارتىپ, ءوسىپ-وركەندەي بەرۋىنە شىنايى تىلەكتەستىك ءبىلدىردى.
