قوعام • 29 ءساۋىر، 2021

«سامۇرىق-قازىنا» قىتايدىڭ ۆاكتسيناسىن ساتىپ الۋىنا قاتىستى تۇسىنىكتەمە بەردى

605 رەت كورسەتىلدى

«سامۇرىق-قازىنا» ۇاق قىتايدىڭ Sinopharm ۆاكتسيناسىن ساتىپ الۋىنا قاتىستى تۇسىنىكتەمە بەردى، دەپ حابارلايدى Egemen.kz قازاقپاراتقا سىلتەمە جاساپ.

«ۆاكتسينا تاڭداۋعا قاتىستى ماسەلەنى «سامۇرىق-قازىنا» ءوزى ايقىندامايدى. بۇل «سق-فارماتسيا» مەن دەنساۋلىق ساقتاۋ مينيسترلىگىنىڭ قۇزىرەتى اياسىنا كىرەدى. ياعني، ولار مۇنداي شەشىمدى قاجەتتى كولەمدە ۆاكتسينانىڭ بولۋىنا، لوگيستيكا مەن تەمپەراتۋرا رەجيمىنە بايلانىستى قابىلداعان سياقتى. «سامۇرىق-قازىنا» قورى 1 ملن دوزا ساتىپ الۋعا تولەم جاسايدى. قازىر ولاردى جەتكىزۋ باستالدى»، دەدى اگەنتتىك تىلشىسىنە «سامۇرىق-قازىنا» ۇاق قوعاممەن بايلانىس جانە ماركەتينگتىك كوممۋنيكاتسيالار دەپارتامەنتىنىڭ ديرەكتورى مارات مۇحامەدساليموۆ.

ونىڭ اتاپ وتۋىنشە، 1 ملن دوزا ۆاكتسينا ساتىپ الۋعا 31،1 ملن دوللار قارجى جۇمسالعان.

«بۇگىن ۆەدومستۆوارالىق كوميسسيا وتىرىسىندا 120 مىڭ دوزا قازاقستان بويىنشا «سامۇرىق-قازىنا» كومپانيالار توبىنىڭ جۇمىسشىلارىنا ەگىلەتىندىگى تۋرالى شەشىم قابىلداندى. ياعني، وندىرىستىك كومپانيالار مەن فيليالداردا ەڭبەك ەتەتىن مۇنايشىلار، ەنەرگەتيكتەر، پوشتا قىزمەتكەرلەرى، ۇشقىشتار، ستيۋاردەسسالار الادى. ال قالعان 880 مىڭ دوزا بارلىق قازاقستاندىققا، نيەت بىلدىرگەن ادامدارعا قولجەتىمدى. باستاپقىدا بۇل ۆاكتسينا «سامۇرىق-قازىنا» كومپانيالار توبىنىڭ جۇمىسشىلارى ءۇشىن ساتىپ الىندى دەگەن اقپارات تاراعان بولاتىن. ول جالعان اقپارات»، دەدى ول.

ايتا كەتەيىك، بۇعان دەيىن «سق-فارماتسيا» «سامۇرىق-قازىنا» ۇلتتىق ءال-اۋقات قورى اق ۇجىمىن ۆاكتسيناتسيالاۋ ءۇشىن 1 000 000 دوزا مولشەرىندە كوروناۆيرۋستىق ينفەكتسياعا قارسى Hayat-Vax (SARS-CoV-2 (Vero Cell) ۆاكتسيناسىنىڭ پارتياسىن ساتىپ العان ەدى.

قىتايدىڭ «Sinopharm» كومپانياسى بىرىككەن اراب امىرلىكتەرىندە وندىرگەن Hayat-Vax (SARS-CoV-2 (Vero Cell) COVID-19 كوروناۆيرۋستىق ينفەكتسياسىنا قارسى ۆاكتسيناسى +2 - +8 گرادۋستا ساقتالادى. 1 ادامعا ۆاكتسينانىڭ 2 دوزاسىن ەنگىزۋ ۇسىنىلادى، ەكىنشى دوزا ءبىرىنشى ينەكتسيادان كەيىن 14 كۇننەن سوڭ جۇرگىزىلەدى.

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار