قوعام • 29 ءساۋىر، 2021

Nur Otan-دا 5 مىڭعا جۋىق ۇيىم باسشىسى سايلاندى

21 رەت كورسەتىلدى

«Nur Otan» پارتياسىندا ەسەپ بەرۋ-سايلاۋ ناۋقانى ءجۇرىپ جاتىر. ءبىرىنشى كەزەڭ اياسىندا 4517 باستاۋىش پارتيا ۇيىمىنىڭ باسشىلارى سايلانىپ، ولارعا 566 مىڭنان استام ادام نەمەسە جالپى پارتيا مۇشەلەرىنىڭ 72%-ى داۋىس بەردى، دەپ حابارلايدى Egemen.kz.

پارتيا ءباسپاسوز قىزمەتى تاراتقان اقپاراتقا سۇيەنسەك، ەسەپ بەرۋ-سايلاۋ ناۋقانى ەلباسى، پارتيا ليدەرى نۇرسۇلتان نازارباەۆتىڭ سايلاۋدان كەيىنگى كەزەڭدە جەرگىلىكتى جەرلەردەگى جۇمىستى جانداندىرۋعا جانە پارتيانىڭ سايلانبالى ورگاندارىنىڭ كادرلىق قۇرامىن جاڭارتۋعا قاتىستى قويعان مىندەتتەرىنە سايكەس جۇرگىزىلۋدە.

ماسەلەن، «Nur Otan» باستاۋىش پارتيا ۇيىمدارىنىڭ جاڭادان سايلانعان توراعالارىنىڭ 39،4%-ى – ايەلدەر، 20%-ى – 35 جاسقا دەيىنگى جاستار.

ايەلدەردىڭ وكىلدىگى  4،4%-عا ارتسا، جاستار سانى 1،5 ەسەگە ءوسىپ وتىر.  ءاربىر بەسىنشى بپۇ-نىڭ توراعاسى پرايمەريز قاتىسۋشىسى بولىپ تابىلادى. ولاردىڭ قاتارىندا ءبىلىم بەرۋ جانە دەنساۋلىق ساقتاۋ سالاسىنىڭ قىزمەتكەرلەرى، ۇكىمەتتىك ەمەس سەكتوردىڭ وكىلدەرى، قوعام بەلسەندىلەرى جانە ت. ب. بار.

ەسەپ بەرۋ-سايلاۋ ناۋقانىنىڭ كەلەسى كەزەڭى اۋماقتىق جانە وڭىرلىك فيليالداردىڭ كونفەرەنتسيالارى بولادى. وندا پارتيانىڭ ساياسي كەڭەستەرى مەن باقىلاۋ-تەكسەرۋ كوميسسيالارىنىڭ قۇرامى جاڭارتىلادى.

ايتا كەتۋ كەرەك، بۇعان دەيىن ەلىمىز بويىنشا «Nur Otan»-نىڭ وڭىرلىك ساياسي كەڭەستەرى بيۋروسىنىڭ وتىرىستارى ءوتىپ، وندا ءار وڭىردە، قالادا جانە اۋداندا سايلاۋالدى ۋادەلەردىڭ ىسكە اسىرىلۋىن باقىلاۋ بويىنشا 1738 جاڭا قوعامدىق كەڭەس قۇرىلدى.

ولاردىڭ قۇرامىنا 12 مىڭنان اسا بەلسەندى، ونىڭ ىشىندە ءماسليحات دەپۋتاتتارى، پارتيالىق كادرلىق رەزەرۆ وكىلدەرى، وڭىردە بەدەلدى جانە جەرگىلىكتى جەرلەردىڭ ءتۇيىندى ماسەلەلەرىن جاقسى بىلەتىن ازاماتتار، قوعام بەلسەندىلەرى، ساراپشىلار جانە ت. ب. كىردى.

پارتيا جاڭا كەڭەستەردىڭ جۇمىسى قوعامدىق پىكىردى ەسكەرىپ، سونداي-اق پارتيانىڭ قوعامدىق قابىلداۋ بولمەلەرىنە ەل كولەمىندە ازاماتتاردان تۇسكەن وتىنىشتەرگە جاسالعان تالداۋعا نەگىزدەلە وتىرىپ، جاريا تۇردە جۇرگىزىلەتىنىنە ۋادە بەرىپ وتىر.

سوڭعى جاڭالىقتار

وتكەن تاۋلىكتە 8 ادام كۆي جۇقتىردى

كوروناۆيرۋس • بۇگىن، 10:35

ۇقساس جاڭالىقتار