«بۇل جوبا كوروناۆيرۋستىڭ تارالۋىن بولدىرماۋعا كومەكتەسەدى. سەبەبى ول كەلۋشىلەر مەن قىزمەتكەرلەردى قاۋىپتى ىندەتتەن قورعايدى. قاۋىپسىز جوبانىڭ ارقاسىندا كينوتەاترلار, فيتنەس-كلۋبتار, باسسەيندەر, تەاترلار سياقتى كوپتەگەن نىساندار جۇمىسىن قايتا باستادى. Ashyq جۇيەسى بويىنشا جۇمىس ىستەيتىن بيزنەس نىساندارى بارلىق كۇندەرى 00:00-گە دەيىن جۇمىس ىستەي الادى. ال وزگەلەرىنە — 22:00-گە دەيىن ءارى دەمالىس كۇندەرى جۇمىس ىستەۋىنە تىيىم سالىنعان. ەگەر ولار ءوز قىزمەتكەرلەرى مەن كەلۋشىلەرىنىڭ قاۋىپسىزدىگى تۋرالى ويلاماسا, ولاردىڭ جۇمىس ۋاقىتىن 20:00-گە دەيىن قىسقارتۋعا ءماجبۇر بولامىز», دەدى ەلوردانىڭ باس مەملەكەتتىك سانيتارلىق دارىگەرى سارحات بەيسەنوۆا.
ۇكىمەت وتىرىسىندا Ashyq جوباسى بويىنشا قىزمەتىن قايتا باستاعان «استانا بالەت» جانە «استانا وپەرا» تەاترلارى جوبانىڭ قاۋىپسىز جانە ءتيىمدى جۇمىسىنىڭ ۇلگىلى مىسالدارى بولىپ سانالاتىنى ايتىلدى. بۇل تەاترلاردىڭ جۇمىس تاجىريبەسىن وڭىرلەرگە كەڭەيتۋ قاجەت.
ەستەرىڭىزگە سالا كەتەيىك, قوعامدىق مەكەمەگە كىرەر الدىندا پايدالانۋشى ارنايى QR-كودتى سكانەرلەيدى جانە ونى كىرەبەرىستەگى اكىمشىگە ۇسىنادى. كود كەلۋشىنىڭ مارتەبەسىن انىقتايدى. ءار تۇسكە سايكەس مارتەبە كەلەسىدەي ماعىنا بەرەدى:
«قىزىل» مارتەبە — پتر-تەست تاپسىرىپ, كوروناۆيرۋس انىقتالعان ادامعا بەرىلەدى. مۇنداي مارتەبە يەلەرى ۇيدە وقشاۋلانۋ رەجيمىن قاتاڭ ساقتاۋى ءتيىس.
«سارى» – بايلانىستا بولعان ادامدارعا بەرىلەتىن مارتەبە. ولارعا ازىق-ت ۇلىك الۋعا نەمەسە ءۇيدىڭ جانىنداعى دارىحاناعا بارۋعا رۇقسات ەتىلگەنمەن, باسقا قوعامدىق ورىندارعا بارۋىنا تىيىم سالىنادى.
«كوك» — اۋرۋ جۇقتىرعان ادامدارمەن بايلانىستا بولعان ادامدار ەسەبىندە جوق, پتر-تەست (مىسالى اۋەجايدا) تالاپ ەتىلەتىن جەرلەردەن باسقا كەز كەلگەن ورىندا ەركىن قوزعالۋ دەگەندى بىلدىرەدى.
«جاسىل» – ءجۇرىپ-تۇرۋىندا شەكتەۋ جوعىن بىلدىرەدى, مۇنداي ادام بازادا COVID-19 ىندەتىنە پتر-تەستىلەۋى تەرىس ناتيجە كورسەتكەن پايدالانۋشى بولىپ سانالادى.
