قوعام • 26 ءساۋىر، 2021

قارۋلى كۇشتەردە «ە-وتىنىشتەر» بىرىڭعاي اقپاراتتىق جۇيەسى ەنگىزىلەدى

16 رەت كورسەتىلدى

قورعانىس مينيسترلىگىنىڭ اپتالىق اپپارات كەڭەسىندە اسكەردىڭ تىنىس-تىرشىلىگىن ۇيىمداستىرۋدىڭ باستى ماسەلەلەرى تالقىلاندى، دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.

قازىرگى كەزدە قۇرىلىمدار مەن اسكەري بولىمدەردە جازعى وقۋ كەزەڭىنە دايىندىق جۇرۋدە. باس قولباسشىلار تەحنيكانى جازعى پايدالانۋ رەجيمىنە اۋىستىرۋ بارىسى، سونداي-اق پوليگوندار مەن وقۋ-جاتتىعۋ الاڭدارىن وق-دارىلەردىڭ قالدىقتارىنان تازارتۋ جونىندە باياندادى.

وڭىرلىك قولباسشىلىقتار مەن اسكەر تەكتەرىندە كوماندالىق قۇرامنىڭ نۇسقاۋ بەرۋ-ادىستەمەلىك ساباقتارى جوسپارلانعان. وندا قىسقى وقىتۋ كەزەڭىنىڭ قورىتىندىلارى شىعارىلىپ، ەكىنشى جارتىجىلدىقتا جاۋىنگەرلىك دايارلىقتى ۇيىمداستىرۋ ءتارتىبى ناقتىلانادى.

قورعانىس ءمينيسترى دايىندىق كەزەڭىندەگى ءىس-شارالاردى وتكىزۋدە قاۋىپسىزدىك جانە سانيتارلىق-ەپيدەميولوگيالىق شارالاردىڭ ساقتالۋىن قامتاماسىز ەتۋگە نۇسقاۋ بەردى.

اسكەرلەردەگى جاۋىنگەرلىك ءتارتىپتىڭ جاي-كۇيى ماسەلەلەرى جەكە قارالدى. 2021 جىلدىڭ ءبىرىنشى توقسانىندا قارۋلى كۇشتەردە قۇقىق بۇزۋشىلىقتار سانى وتكەن جىلدىڭ وسى كەزەڭىمەن سالىستىرعاندا 4%-عا تومەندەگەن.

قورعانىس ۆەدومستۆوسىنىڭ باسشىسى وڭ ديناميكاعا قاراماستان، اسكەري قىزمەتشىلەر اراسىندا قۇقىقتىق ءتارتىپتى بۇزۋعا جول بەرىلمەۋىنە تاعى دا نازار اۋداردى. ول ءۇشىن بارلىق ساناتتاعى اسكەري كومانديرلەرگە، سەرجانتتىق قۇرام مەن تاربيە قۇرالىمدارىنىڭ وفيتسەرلەرىنە اسكەري ۇجىمدارداعى بارلىق ۇدەرىستەردى جەكە ۇعىنۋ، بەلگىلەنگەن جوسپارلار مەن باعدارلامالار بويىنشا عانا ارەكەت ەتۋگە ەمەس، جەكە قۇراممەن جۇمىس ىستەۋدىڭ ستاندارتتى ەمەس نىساندارى مەن ادىستەرىن قولدانۋ تاپسىرىلدى. ءاربىر قۇقىق بۇزۋشى قىلمىستىق جاۋاپكەرشىلىككە دەيىن جازاعا تارتىلىپ، قارۋلى كۇشتەر قاتارىنان شىعارىلۋى ءتيىس. ءوزىنىڭ باسشىلىعىندا قاتەلىكتەر جىبەرگەن كومانديرلەر مەن باستىقتار اتقاراتىن لاۋازىمدارىنا سايكەس كەلۋ ماسەلەسى قاراستىرىلادى.

مەرەكە كۇندەرى قارساڭىندا جوعارى قىراعىلىقتى، كەزەكشى كۇشتەر مەن قۇرالداردىڭ دايىندىعىن، اسكەري وبەكتىلەردىڭ ديۆەرسياعا قارسى قاۋىپسىزدىگىن، اسكەري ءتارتىپتى ساقتاۋدى قامتاماسىز ەتۋ تۋرالى نۇسقاۋلار بەرىلدى. مەرەكەلىك ءىس-شارالار ادامداردىڭ كوپ جينالۋىن بولدىرماۋدى ەسكەرە وتىرىپ، جوسپارلاناتىن بولادى.

قارۋلى كۇشتەردىڭ اسكەري قىزمەتشىلەرى مەن ازاماتتىق پەرسونالىن ۆاكتسيناتسيالاۋ جالعاسۋدا. باس اسكەري-مەديتسينالىق باسقارما باستىعىنىڭ بايانداماسى بويىنشا 2021 جىلدىڭ 26 ساۋىرىندەگى جاعداي بويىنشا ەكپە العانداردىڭ جالپى سانى 23 مىڭنان استام ادامدى قۇرادى. ياعني، وتكەن اپتادا 11 مىڭنان استام اسكەري قىزمەتشى مەن ازاماتتىق پەرسونال وكىلدەرى ەكپە سالدىردى.

قورعانىس ءمينيسترىنىڭ ورىنباسارى دارىن تۇياقوۆ ارميانى تسيفرلاندىرۋ اياسىندا «ە-ءوتىنىش» جۇيەسىن ەنگىزۋ تۋرالى باياندادى. ول بۇكىل ءۇردىستى اشىق جانە قورعانىس مينيسترلىگىنە كەلىپ تۇسكەن وتىنىشتەردى قاراۋ مەرزىمدەرىن قىسقارتۋعا مۇمكىندىك بەرەدى.

قازىرگى ۋاقىتتا بارلىق گارنيزونداردا 867 اۆتوماتتاندىرىلعان جۇمىس ورىندارىن جابدىقتاۋ، سونداي-اق پەرسونالدى وقىتۋ جۇرگىزىلۋدە. قارۋلى كۇشتەردى بىرىڭعاي اقپاراتتىق جۇيەگە قوسۋ 2021 جىلدىڭ 1 شىلدەسىنە قاراي جۇزەگە اسىرۋ جوسپارلانىپ وتىر.

قورعانىس ءمينيسترى «ە-ءوتىنىش» – «حالىق ۇنىنە قۇلاق اساتىن مەملەكەت» تۇجىرىمداماسىنداعى ماڭىزدى قۇرال ەكەنىن، سوندىقتان بىرىڭعاي اقپاراتتىق جۇيەنى ەنگىزۋ جونىندەگى بارلىق ءىس-شارالاردى ۋاقتىلى جانە ساپالى ورىنداۋ قاجەتتىگىن اتاپ ءوتتى.

سوڭعى جاڭالىقتار

ۇقساس جاڭالىقتار