«1,5 جىل نيۋ-يورك كينو اكادەمياسىنىڭ فيليالىن قازاقستاندا اشۋ ءۇشىن كەلىسسوز جۇرگىزىلدى. وتە قيىن بولدى. كوپتەگەن قۇجات جينادىق. باعدارلاما دايىن. قازىر ۇكىمەتكە ارنايى حات جىبەردىك. ەندى ۇكىمەتتىڭ شەشىمىمەن ءبىلىم جانە عىلىم مينيسترلىگىنەن ليتسەنزيا الساق جەتكىلىكتى», دەدى ارىستانبەك مۇحامەدي ۇلى You Tube-تاعى Qasqa Jol ارناسىنا بەرگەن سۇحباتىندا.
جاڭا ۋنيۆەرسيتەتتىڭ جۇمىسى NYFA مەن قازاق عىلىمي-زەرتتەۋ ينستيتۋتىنىڭ اراسىنداعى كەلىسىمشارت نەگىزىندە جۇرگىزىلەدى. وقۋ ورنىنىڭ عيماراتى الماتىدا سالىنادى, وعان «قازاق كينو جانە TV اكادەمياسى» دەگەن اتاۋ بەرىلەدى.
«ستۋدەنتتەر كەلىسسوز بويىنشا 1,5 جىل الماتىدا, 1,5 جىل اقش-تا وقيدى. اكادەميانىڭ لوس-اندجەلەستە, نيۋ-يوركتا, ماياميدە فيليالدارى بار. وقۋدى اياقتاعان سوڭ New York Film Academy ديپلومى بەرىلەدى», دەدى ديرەكتور.
ارىستانبەك مۇحامەدي ۇلىنىڭ ايتۋىنشا, بۇل جوو اشىلسا, قازاقستانعا اقش-تىڭ ءىرى كينوكومپانيالارى كەلۋى مۇمكىن.
«ەلىمىزگە شەتەلدەن ستۋدەنتتەر كەلە باستايدى. سەبەبى اكادەميانى ورتا ازيادا ءبىرىنشى بولىپ اشقالى جاتىرمىز. وقىتۋشىلاردىڭ 90%-ى اقش-تان كەلەدى», دەدى ارىستانبەك مۇحامەدي ۇلى.
ايتا كەتەيىك, New York Film Academy-ءدىڭ اقش-تان بولەك, فرانتسيا, يتاليادا فيليالدارى بار.
