«اۋىل شارۋاشىلىعىندا, جەر ماسەلەسىندە قوردالانعان, بۇعان دەيىنگى جەر كوميسسياسىنان تىس قالىپ, شەشىمىن تاپپاعان ماسەلەلەرگە قاتىستى ناقتى ۇستانىمدار قابىلدانىپ جاتىر. ءبىز, پارلامەنت رەتىندە ۇلكەن زاڭدار لەگىن, اتاپ ايتقاندا, جەر كودەكسى مەن اۋىل شارۋاشىلىعىنا قاتىستى زاڭدارعا وزگەرىستەردى كۇتىپ وتىرمىز. ونىڭ ىشىندە, بۇگىنگى, بۇعان دەيىنگى 4-وتىرىستا, ودان تىس جۇمىس توپتارىندا ايتىلعان دەرەكتەردى الىپ, قۇداي قالاسا زاڭدىق نەمەسە ءتيىستى نورماتيۆتىك-قۇقىقتىق شەشىمگە اينالدىرۋ ىسىمەن اينالىسۋ كەرەك بولادى. مۇنىڭ ىشىندە ەڭ باستىسى قوعامدى ابىگەرگە سالعان, ماسەلە تۋدىرعان جەردى جەكەمەنشىككە بەرۋ جايىنا قاتىستى ايتار بولساق, بۇگىنگى كۇنى تولىق اقپارات جوق, جەر قىرتىسى ەگجەي-تەگجەيلى زەردەلەنبەگەن, قوعام ىشىندە سەنىمسىزدىك تۋىنداعان جاعدايدا بۇل ماسەلەنى تۇبەگەيلى شەشۋ قيىن دەپ ەسەپتەيمىن», دەدى ايدوس سارىم اتالعان كوميسسيانىڭ 5-وتىرىسىنان كەيىن.
ونىڭ اتاپ وتۋىنشە, شەشىم قابىلداۋشى ۇكىمەت, پارلامەنت دەيتىن بولساق, وندا بۇگىنگى كۇنى سىرتتان كورسەتىلىپ جاتقان قىسىمدى ساناعا ەمەس, كوڭىل-كۇيگە باعىنعان ارەكەت دەپ باعالاۋعا بولادى.
«سوندىقتان ءار تاراپقا دا شەشىم قابىلداۋ ءۇشىن ناقتى, شىنايى اقپارات قاجەت. سەنىمسىزدىكتى جويۋدىڭ ءبىر عانا جولى – فاكت. شىن مانىندە ءبىر-ەكى جىلدىڭ ىشىندە جەر كاداسترى اشىلسا, قاي جەردىڭ يەسى كىم ەكەنى كورسەتىلسە, الداعى ۋاقىتتا جايىلىمدار قايتارىلسا, پاندەميادان كەيىن ەكونوميكامىز كوتەرىلىپ, الەۋمەتتىك ماسەلەلەر شەشىلىپ, حالىقتىڭ ەڭسەسى كوتەرىلىپ جاتسا, وندا سول كەزدە جەكەمەنشىك ماسەلەسىن كوتەرۋگە بولادى. سوندىقتان جەردى جەكەمەنشىككە بەرۋگە قاتىستى ءموراتوريدى 5 جىلعا سوزۋ تۋرالى ماسەلەنى پرەزيدەنتكە ۇسىنۋ قاجەت. بۇل - پرەزيدەنت قابىلدايتىن ۇلكەن شەشىم», دەدى ءماجىلىس دەپۋتاتى.
