قوعام • 22 ءساۋىر، 2021

تجم باسشىسى سۋ تاسقىنى قاۋپى بار ۋچاسكەلەردى اۋەدەن باقىلادى

19 رەت كورسەتىلدى

21-22 ساۋىردە توتەنشە جاعدايلار ءمينيسترى يۋري يلين اقمولا جانە سولتۇستىك قازاقستان وبلىستارىنىڭ سۋ تاسقىنى قاۋپى بار ۋچاسكەلەرى مەن ەلدى مەكەندەرىنە اەروۆيزۋالدى باقىلاۋ جۇرگىزدى، دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.

قاۋىپتى ايماقتاردى اۋەدەن باقىلاۋ جۇمىستارىنا تج ۆيتسە-ءمينيسترى مارات كۇلدىكوۆ، اقمولا جانە سولتۇستىك قازاقستان وبلىستارى تج دەپارتامەنتتەرىنىڭ باسشىلارى، اكىمدەرىنىڭ ورىنباسارلارى مەن بۇقارالىق اقپارات قۇرالدارىنىڭ وكىلدەرى قاتىستى.

ۇشۋ بارىسىندا اقمولا وبلىسىنىڭ تسەلينوگراد، استراحان، اتباسار، ساندىقتاۋ، زەرەندى اۋداندارىنىڭ جانە سولتۇستىك قازاقستان وبلىسىنىڭ ايىرتاۋ، ەسىل، اققايىڭ، تايىنشا، ەسىل، ع.مۇسىرەپوۆ، شال اقىن اۋداندارىنىڭ قاۋىپتى ۋچاسكەلەرى مەن ەلدى مەكەندەرى تەكسەرىلدى. ەسىل جانە جاباي وزەندەرىنىڭ ارناسىن بويلاي ۇشقان ارنايى توپ اقمولا جانە سولتۇستىك قازاقستان وبلىستارىنداعى سۋ تاسقىنى قاۋپى ەداۋىر سەيىلگەنىن اڭعاردى.

«اقمولا وبلىسىنىڭ اۋماعىندا جوسپارلى ۇشۋ سۋ تاسقىنى جاعدايى قالىپتى ەكەنىن كورسەتتى. جالعىز قاۋىپ كولۋتون وزەنىنىڭ كەي بولىكتەرىندە بايقالادى. ءبىر اپتا بويى سۋ دەڭگەيى كوتەرىلگەن. قازىر ول تومەندەۋدە. شامامەن 10-14 كۇننەن كەيىن جاعداي قالپىنا كەلۋى ءتيىس»، دەدى يۋري يلين.

ءوز كەزەگىندە اقمولا وبلىسى اكىمىنىڭ ورىنباسارى عالىمجان ابدىقالىقوۆ بارلىق وزەندەردە سۋدىڭ تومەندەۋى بايقالاتىنىن جانە سۋ ايدىندارى ءوز ارنالارىنا كىرگەنىن ايتتى.

سونىمەن قاتار يۋري يلين اۋەدەن باقىلاۋ بارىسىندا ورمان پايدالانۋشىلارى مەن شارۋا قوجالىقتارى  اقمولا جانە سولتۇستىك قازاقستان وبلىسىنىڭ كەيبىر اۋداندارىندا ورمان القابى ماڭىنداعى قۇرعاق ءشوپتى جوسپارلى ورتەۋ جۇمىستارىنا  كىرىسكەنىن ەسكەرتتى. 

ءمينيستردىڭ سوزىنشە، كوكتەمدە بۇل جۇمىستار كوبىنەسە باقىلاۋسىز جۇرگىزىلەدى جانە ءىرى ورتتەردىڭ تۋىنداۋىنا سەبەپ بولادى. ولار بۇل جۇمىستاردى قار ەري سالىسىمەن باستاپ كەتەدى. الايدا قۇرعاق ءشوپتى جاعۋ جۇمىستارى جۇرگىزىلگەن جاعدايدا، شارۋالار تج دەپارتامەنتتەرىنە حابارلاسۋى ءتيىس. بۇل فاكت تەرىس سالدارعا اكەپ سوقتىرماس ءۇشىن الدىن الا ەسكەرتۋ قاجەت.

كەلەسى باعىت سولتۇستىك قازاقستان وبلىسىنىڭ اۋماعىندا ءوتتى. ۇشۋ بارىسىندا ەسىل وزەنى ارناسىنىڭ تومەنگى جاعىندا سۋ دەڭگەيى كوتەرىلىپ، سۋ وزەن بويىن تولتىراتىنى انىقتالدى. قازىرگى ۋاقىتتا سۋ تاسقىنى ەسىل اۋدانىنىڭ پوكروۆكا اۋىلىنىڭ ماڭىندا وتۋدە. سۋ دەڭگەيىنىڭ كوتەرىلۋى شەكتى بەلگىلەرگە جەتكەن جوق. وزەن ارناسى تازا، مۇز قۇبىلىستارى بايقالمايدى.

ءىس-شارا سوڭىندا مينيستر اقمولا جانە سولتۇستىك قازاقستان وبلىستارىنداعى  سۋ تاسقىنى جاعدايىن باقىلاۋ بويىنشا بىرقاتار تاپسىرما بەردى.

سوڭعى جاڭالىقتار

ۇقساس جاڭالىقتار