تۇركىستان وبلىسىنىڭ پوليتسياسى قىزىل كىتاپقا ەنگەن قىزعالداقتاردى جۇلعان ەر ادامدى ۇستاپ, اۋداندىق پوليتسيا بولىمىنە جەتكىزدى. زاتتاي دالەل رەتىندە تاركىلەنگەن التى قىزعالداق ساراپتاماعا جىبەرىلگەن. «سايرام-وگەم» مەملەكەتتىك تابيعي پاركىنىڭ قورىتىندىسىنا سايكەس, ج ۇلىنعان گۇلدەر قازاقستاننىڭ قىزىل كىتابىنا ەنگەن «گرەيگ» قىزعالداقتارى بولىپ شىقتى.
اتالعان فاكتى بويىنشا قر قك 339-بابى 1-بولىگى «سيرەك كەزدەسەتىن جانە جوعالىپ كەتۋ قاۋپى بار, سونداي-اق پايدالانۋعا تىيىم سالىنعان وسىمدىكتەر مەن جانۋارلار تۇرلەرىن, ولاردىڭ بولىكتەرى مەن دەريۆاتتارىن زاڭسىز پايدالانۋ» بويىنشا قىلمىستىق ءىس قوزعالدى.
پوليتسەيلەر قازاقستاننىڭ قىزىل كىتابىنا ەنگەن گۇلدەردى جۇلعانى ءۇشىن قاتاڭ قىلمىستىق جاۋاپكەرشىلىك قاراستىرىلعانىن ەسكەرتتى.
«اتالعان باپتىڭ سانكتسيالارى 3000 اەك-كە دەيىنگى مولشەردە ايىپپۇل تۇرىندە, نەمەسە سول مولشەردە تۇزەۋ جۇمىستارىمەن, 800 ساعاتقا دەيىنگى مەرزىمگە قوعامدىق جۇمىستارعا تارتۋمەن جازالاۋدى كوزدەيدى. ءۇش جىلعا دەيىنگى مەرزىمگە باس بوستاندىعىن شەكتەۋگە دە بولادى. سونداي-اق مۇلكىن تاركىلەپ, بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان بەس جىلعا دەيىنگى ايىرىعا جانە سول مەرزىمگە باس بوستاندىعىنان ايىرۋعا بولادى», دەلىنگەن حابارلامادا.
