اقتاۋداعى كاسپي يتبالىعىن زەرتتەۋ جانە وڭالتۋ ورتالىعىنا 29 ناۋرىزدا ساعات 10.00-دە جەرگىلىكتى تۇرعىنداردان باۋتينو كەنتىندە تەڭىز جاعاسىندا يتبالىق تابىلعانى تۋرالى قوڭىراۋ تۇسكەن. تۇرعىنداردىڭ ايتۋىنشا, يتبالىق جاعادا ەكى كۇندەي جاتىپ قالعان. بۇدان سوڭ اتالعان ورتالىق ماماندارى يتبالىق تابىلعان جەرگە بارىپ, وعان العاشقى ۆەتەريناريالىق كومەك كورسەتكەن.
«العاشىندا يتبالىقتىڭ جاعدايى قيىن بولدى. ول وتە ءالسىز ءارى قوزعالىسسىز جاتتى. سول كۇنى ونى ورتالىققا جەتكىزدىك. بوزداقتىڭ جاسى-ءبىر اي, دەنە سالماعى-4,4 كەلى. ول بۇل جاستا 10-12 كەلى تارتۋى كەرەك», دەلىنگەن حابارلامادا.
بوزداق اقتاۋ قالاسىنداعى كاسپي يتبالىعىن زەرتتەۋ جانە وڭالتۋ ورتالىعىندا ەكى اپتاداي بولعان. ورتالىققا تۇسكەن كەزدە ءالسىز, سالماعى 4,4 كەلى عانا بولسا, قازىر 7 كەلىگە دەيىن جەتكەن.
«بوزداقتىڭ تابەتى جاقسى, وتە ەپتى, ول ءوز كۇشىمەن تاعام جەي باستادى. ەكتوپارازيتتەردەن تازارتۋ پروتسەدۋراسىن وتكىزدىك», دەلىنگەن حابارلامادا.
