باسكول جانە اقجار اۋىلدارىنداعى ماگيسترالدىق سۋ قۇبىرىنا توقسان سايىن وندىرىستىك باقىلاۋ جۇرگىزىلەدى, كەلەسى باقىلاۋ بيىلعى 20 ساۋىردە.
ەكولوگيا, گەولوگيا جانە تابيعي رەسۋرستار مينيسترلىگى ءباسپاسوز قىزمەتىنىڭ حابارلاۋىنشا, سۋ رەسۋرستارى كوميتەتىنىڭ وكىلدەرى جۇمىس ساپارىمەن پاۆلودار وبلىسى ماي اۋدانىنىڭ مالايسارى اۋىلىنا باردى. ساپار بارىسىندا جەرگىلىكتى تۇرعىندارمەن كەزدەسۋ ءوتتى. جيىندا اۋىلدىڭ تۇرعىندارى اۋىز سۋدىڭ ساپاسىنا قاتىستى ءبىراز ماسەلە كوتەردى. كەزدەسۋ قورىتىندىسى بويىنشا سۋ رەسۋرستارى كوميتەتىمەن بىرلەسە اۋىز سۋدىڭ ساپاسىنا اشىق تاۋەلسىز زەرتحانالىق زەرتتەۋ جۇرگىزۋ تۋرالى شەشىم قابىلداندى.
ەسكە سالا كەتەيىك, سۋ رەسۋرستارى كوميتەتىنىڭ باستاماسىمەن پاۆلودار وبلىسىنىڭ ماي اۋدانىندا جەرگىلىكتى توپتىق سۋ قۇبىرىن قايتا قۇرۋ جوباسى جۇزەگە اسىرىلدى. ناتيجەسىندە, 2020 جىلدىڭ مامىر ايىندا سۋدى تازارتۋ ستانساسى ىسكە قوسىلدى. بۇل 11 مىڭ تۇرعىنى بار 16 اۋىلدى ساپالى اۋىز سۋمەن قامتاماسىز ەتۋگە مۇمكىندىك بەردى. سۋ قۇبىرىنىڭ ۇزىندىعى 146 شاقىرىمدى قۇرايدى, سۋمەن جابدىقتاۋ كوزى – جەراستى سۋلارى. جوبالىق ونىمدىلىگى – تاۋلىگىنە 4 150 تەكشە مەتر. ماي اۋدانى توپتىق سۋ قۇبىرىن قايتا قۇرۋ جانە سۋ تازارتۋ ستانساسىن ىسكە قوسقاننان كەيىن اۋدان حالقى ساپالى اۋىز سۋدى عانا ەمەس, سونىمەن قاتار تۇرمىستىق ماقساتتار ءۇشىن تازارتىلعان سۋدى دا الدى. قازىرگى ۋاقىتتا توپتىق سۋ قۇبىرى جوسپارلى رەجىمدە جۇمىس ىستەيدى.
