ايماقتار • 20 ءساۋىر، 2021

پەتروپاۆلدا ماس جۇرگىنشى اسكەري جاساققا شابۋىل جاسادى

23 رەت كورسەتىلدى

سولتۇستىك قازاقستان وبلىسى پوليتسيا دەپارتامەنتى ءباسپاسوز قىزمەتىنىڭ مالىمەتىنشە، 18 ءساۋىر ساعات 20.00 شاماسىندا پاترۋلدەردىڭ ءبىرى پەتروپاۆلداعى ۋليانوۆ كوشەسىندە ماس جۇرگىنشىنى بايقاعان، دەپ حابارلايدى Egemen.kzء ىىم سىلتەمە جاساپ.

ەر ادام اسكەري جاساقتىڭ مەديتسينالىق كۋالاندىرۋدان ءوتۋ ۇسىنىسىنا قارسىلىق ءبىلدىرىپ، ءوزىن اگرەسسيۆتى ۇستاعان. اراقتىڭ سىنعان بوتەلكەسىمەن وزىنە جاراقات كەلتىرىپ، اسكەري قىزمەتشىگە جۇدىرىق الا ۇمتىلعان.

شابۋىل جاساعان ەر ادام ۇستالىپ، اۆتوپاترۋلگە تاپسىرىلدى. اتالعان فاكتى «بيلىك وكىلىنە قاتىستى كۇش قولدانۋ» بابى بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە ەنگىزىلدى. كۇدىكتى بۇرىن ادام ولىمىنە اكەپ سوقتىرعان اۋىر دەنە جاراقاتىن كەلتىرگەنى جانە توناعانى ءۇشىن بۇرىن سوتتالعان 29 جاستاعى پەتروپاۆل تۇرعىنى بولىپ شىقتى. مەديتسينالىق كۋالاندىرۋ ونىڭ ماستىعىن راستادى.

«كۇدىكتىگە قاماۋعا الۋ تۇرىندەگى بۇلتارتپاۋ شاراسى قولدانىلدى. باپتىڭ سانكتسياسى ءىرى مولشەردەگى ايىپپۇلدان 3 جىلعا دەيىن باس بوستاندىعىنان ايىرۋ جازاسىن كوزدەيدى. بيىل وبلىس ورتالىعىندا بيلىك وكىلىنە قاتىستى كۇش قولدانۋدىڭ 2 دەرەگى تىركەلدى. تاجىريبە كورسەتكەندەي، مۇنداي جاعداي سپيرتتىك ىشىمدىكتى اسىرا پايدالانۋمەن بايلانىستى بولادى»، دەيدى پەتروپاۆل قالالىق پوليتسيا باسقارماسىنىڭ باستىعى جاندوس مۇقاتوۆ.

پەتروپاۆلدا كۇن سايىن 151 اسكەري قىزمەتشى قۇقىقتىق ءتارتىپتى ساقتاۋعا كەزەكشىلىككە تۇسەدى. پوليتسيانىڭ كەشەندى كۇشتەرى قۇرامىندا ولار قالا كوشەلەرىن پاترۋلدەيدى، شاقىرتۋلارعا بارادى، باعدارلارمەن جۇمىس ىستەيدى.

سوڭعى جاڭالىقتار

اقىرەتكە دەيىنگى ادالدىق

ونەر • بۇگىن، 10:23

ۇقساس جاڭالىقتار