15 ساۋىردە كريمينالدىق پوليتسيا ءبولىمىنىڭ جەدەل ۋاكىلدەرى ءمۇيىز ساتۋ سالاسىنداعى قىلمىستاردى انىقتاۋ جانە جولىن كەسۋ كەزىندە قاراعاندى وبلىسى جاڭاارقا اۋدانى اۋىلدارىنىڭ بىرىندە 34 جاستاعى ەر ادام باسقارعان اۆتوكولىكتى ۇستادى.
– بۇل كولىكتىڭ ىشىندە جاڭاارقا اۋدانىنىڭ 34 جاستاعى تۇرعىنى جانە قاراعاندى قالاسىنىڭ 28 جاستاعى ەكى تۇرعىنى بولدى. تەكسەرۋ جانە تەرگەۋ ارەكەتتەرى بارىسىندا پوليتسەيلەر كولىك ىشىنەن 274 كيىك ءمۇيىزى مەن ءتۇرلى ماركالى قارۋدى تاركىلەدى, – دەدى وبلىستىق پوليتسيا دەپارتامەنتى باستىعىنىڭ ورىنباسارى ءابىل ءابىلدين.
اتالعان فاكت بويىنشا قر قىلمىستىق كودەكسىنىڭ 339-بابى (سيرەك كەزدەسەتىن جانە قۇرىپ كەتۋ قاۋپى تونگەن تۇرلەرگە, سونداي-اق تىيىم سالىنعان وسىمدىك نەمەسە جانۋارلار تۇرلەرىنە, ولاردىڭ بولىكتەرىنە نەمەسە تۋىندىلارىنا زاڭسىز قاتىناس جاساۋ) بويىنشا سوتقا دەيىنگى تەرگەۋ باستالدى. وسى باپتىڭ سانكتسياسى جەتى جىلعا دەيىن باس بوستاندىعىنان ايىرۋ تۇرىندەگى جازانى قاراستىرادى. سونداي-اق قر قىلمىستىق كودەكسى 287 بابى (زاڭسىز اتىس قارۋىن ساقتاۋ) بويىنشا ءىس قوزعالدى. قازىرگى ۋاقىتتا تەرگەۋ امالدارى جۇرگىزىلىپ جاتىر. ۇستالعاندار ۋاقىتشا قاماۋعا الىندى.
