«قالادا 100 ەگۋ كابينەتىندە ۆاكتسينالاۋعا جاتاتىن كونتينگەنتتەردى قامتۋ جۇمىسى جالعاسۋدا, ونىڭ ىشىندە «Mega Silk Way» جانە «حان شاتىر» ساۋدا-ويىن ورتالىقتارىندا ەگۋ پۋنكتتەرى اشىلدى, سونداي-اق باسقا دا ساۋدا-ويىن ورتالىقتارى مەن ساۋدا ۇيلەرىندە اشۋ جوسپارى قارالۋدا. قازىرگى ۋاقىتتا ادام كوپ جينالاتىن جەرلەردە قوسىمشا ەگۋ كابينەتتەرىن اشۋ بويىنشا دايىندىق جۇمىستارى جۇرۋدە. جاقىن ارادا مۇنداي پۋنكتتەر «كەرۋەن» ساۋدا-ويىن-ساۋىق ورتالىعى مەن ء«ابۋ-دابي پلازا» كەشەنىندە دە اشىلادى», دەدى س. بەيسەنوۆا ەلوردا اكىمدىگىندە وتكەن بريفينگىدە.
سپيكەردىڭ ايتۋىنشا, ساۋدا-ويىن-ساۋىق ورتالىقتارىندا دا مەديتسينا ۇيىمدارى سەكىلدى بارلىق سانيتاريالىق-ەپيدەميالىق تالاپتار ساقتالادى.
«بۇل تالاپتار – بولمە جيىنتىعى, جاراقتاندىرۋ, جىلجىمالى ەگۋ پۋنكتتەرىن ايماقتارعا ءبولۋ جانە ت.ب. قازىرگى ۋاقىتتا دەپارتامەنت ماماندارى وسى ماسەلەلەردىڭ بارلىعىن پىسىقتاپ جاتىر», دەدى سپيكەر.
