ادەبيەت • 14 ءساۋىر، 2021

«ماحاببات، قىزىق مول جىلدار» رومانى جاڭا فورماتتا قايتا باسىلىپ شىقتى

244 رەت كورسەتىلدى

«فوليانت» باسپاسىندا قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى ءازىلحان نۇرشايىقوۆتىڭ قايتا باسىلىپ شىققان «ماحاببات، قىزىق مول جىلدار» رومانىنىڭ تۇساۋكەسەرى ءوتتى، دەپ حابارلايدى Egemen.kz.

شاراعا ەڭبەك سىڭىرگەن قايراتكەرى، جازۋشى، جۋرناليست قايسار ءالىم، اكتەرلەر ەرمەك تۇرعانبەك، نارقىز ايداروۆا، جازۋشىنىڭ جاقىندارى، زيالى قاۋىم وكىلدەرى، قالا تۇرعىندارى قاتىستى.

اتالعان رومان تۇڭعىش رەت 1970 جىلى «جازۋشى» باسپاسىنان جارىق كورگەن بولاتىن. شىعارما ەكى جاستىڭ اراسىنداعى ماحاببات تۋرالى باياندايدى. اۆتور سوعىستان ون ەكى مۇشەسى تۇگەل كەلگەن جاس سولداتتىڭ ءومىرى، ويلارىن جاسىرماي، كوپشىلىككە پاش ەتەدى. ونىڭ 33-اۋديتوريادا ءوزىن گۇلدى باقتا وتىرعانداي سەزىنۋى، قىزداردىڭ تاستاي قىلىپ ورىلگەن بۇرىمدارىنا كوز سالۋى، دوستارىن، ماحابباتىن تابۋى، بولاشاعىنا جول اشىپ، ءوز جولىن تابۋى كوركەمدىكپەن باياندالادى.

ءازىلحان نۇرشايىقوۆتىڭ ءار كەيىپكەرى، ولاردىڭ اراسىنداعى كىرشىكسىز تازا سەزىم، سۇيىسپەنشىلىك، ماحاببات حيكايالارى وقىرماننىڭ كوزىنە جاس الدىردى. قالىڭ وقىرماننىڭ سۇيىكتى شىعارماسىنا اينالعان، جاس ۇرپاقتى ادال ماحابباتقا، شىنايى دوستىق پەن سەرتىنە بەرىك بولۋعا تاربيەلەيتىن اتالعان روماندى باسپا جازۋشىنىڭ 100 جىلدىق مەرەيتويىنا ارناپ شىعاردى.

جاقىندا قالىڭ وقىرماننىڭ تۇمارىنداي بولعان شىعارمانىڭ جەلىسىمەن «MG Prodution plus» كينوكومپانياسى تۇسىرگەن «ماحاببات، قىزىق مول جىلدار» تەلەحيكاياسى كورەرمەن نازارىنا ۇسىنىلدى. جۇرتشىلىقتىڭ ىستىق ىقىلاسىنا بولەنگەن تۋىندى «QAZAQSTAN» ۇلتتىق ارناسىنىڭ تاپسىرىسىمەن ۇلى جەڭىستىڭ 75 جىلدىعىنا وراي قولعا الىنعان ەكەن.

«فوليانت باسپاسىنىڭ باس رەداكتورى فاريدا توباشالوۆا كىتاپ مۇقاباسىنا تەلەحيكايانىڭ كادرى ارقاۋ بولعانىن ايتتى.

«ماحاببات قىزىق مول جىلدار رومانى – عاشىقتىق، ماڭگىلىك ماحاببات تاقىرىبىنداعى سۇبەلى تۋىندىنىڭ ءبىرى. كەزىندە قالىڭ وقىرماننىڭ سۇيىكتى شىعارماسى بولعان بۇل كىتاپ بۇگىنگى وقىرمان جۇرەگىنەن دە ورىن تاۋىپ كەلەدى. بۇل شىعارمانىڭ كيەلىلىگى – وقىرماندى وزىنە باۋراپ الۋىندا. سونداي-اق روماننىڭ ورىس تىلىندەگى نۇسقاسى باسپامىزدان جاقىن ارادا جارىققا شىعاتىنىن اتاپ وتكىم كەلەدى. وسى ورايدا، اكەسىنىڭ شىعارماشىلىعىنا بەيجاي قاراماي، كىتاپتى باسپاعا دايىنداۋ بارىسىنداعى تۋىنداعان سۇراقتارعا، كىتاپ ديزاينىنا قاتىستى ماسەلەلەردە بارىنشا بەلسەندىلىك تانىتقانى ءۇشىن قىزى جاننات ازىلحانقىزىنا العىسىمىز شەكسىز»، دەپ اتاپ ءوتتى ول.

سوڭعى جاڭالىقتار

اقىرەتكە دەيىنگى ادالدىق

ونەر • بۇگىن، 10:23

ۇقساس جاڭالىقتار