«بۇگىن – قازاقستانداعى عىلىم قىزمەتكەرلەرىنىڭ كۇنى. كۇنتىزبەدەگى بۇل داتا كەزدەيسوق تاڭدالماعانى بەلگىلى. 12 ءساۋىر – عىلىم اكادەمياسىنىڭ تۇڭعىش پرەزيدەنتى, كورنەكتى عالىم-گەولوگ قانىش ساتباەۆتىڭ دۇنيەگە كەلگەن كۇنى. قازاقتان شىققان تۇڭعىش اكادەميكتىڭ عىلىم سالاسىندا جولىن قۋعان ءىزباسارلارى از ەمەس. ءبىز عىلىمنىڭ دامۋىنا زور ۇلەس قوسىپ كەلە جاتقان عالىمدارىمىزدى ماقتان تۇتامىز», دەپ جازدى مينيستر Facebook پاراقشاسىندا.
ونىڭ اتاپ وتۋىنشە, ەلىمىزدەگى عىلىم سالاسىنىڭ الەۋەتى زور. ماسەلەن, بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى عالىمدارىنىڭ كوروناۆيرۋسقا قارسى ازىرلەگەن ۆاكتسيناسىن ەرەكشە اتاپ وتۋگە بولادى.
«بۇگىنگى تاڭدا عىلىم سالاسىنىڭ جەتىستىكتەرى ايتارلىقتاي كوپ, دەگەنمەن پروبلەمالار دا جوق ەمەس. سوندىقتان ءبىز ءوز تاراپىمىزدان ەلىمىزدەگى عىلىمنىڭ ودان ءارى دامۋى ءۇشىن كەشەندى شارالار قابىلداپ جاتىرمىز. عىلىمدى رەسپۋبليكالىق بيۋدجەتتەن قارجىلاندىرۋ كولەمى سوڭعى ەكى جىلدا شامامەن ەكى ەسەگە ارتتى. 2025 جىلعا قاراي عىلىمدى قارجىلاندىرۋ كولەمىن جالپى ىشكى ءونىمنىڭ 1 پايىزىنا دەيىن ۇلعايتۋ جوسپارلانعان. بۇل – وتاندىق عىلىمنىڭ دامۋىنا ۇلكەن سەرپىن بەرەرى ءسوزسىز», دەدى اسحات ايماعامبەتوۆ.
