پرەزيدەنت • 09 ءساۋىر، 2021

پرەزيدەنت اتىراۋ جانە اقتوبە وبلىستارى اكىمدەرىنىڭ ەسەبىن تىڭدادى

47 رەت كورسەتىلدى

مەملەكەت باسشىسى قاسىم-جومارت توقاەۆقا اتىراۋ جانە اقتوبە وبلىستارىنىڭ اكىمدەرى وڭىرلەردە قالىپتاسقان قازىرگى سانيتارلىق-ەپيدەميولوگيالىق جانە الەۋمەتتىك-ەكونوميكالىق جاعدايدى تەلەفون ارقىلى باياندادى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي Facebook-تەگى پاراقشاسىندا جازدى، دەپ حابارلايدى Egemen.kz.

اتىراۋ وبلىسىنىڭ اكىمى ماحامبەت دوسمۇحامبەتوۆ پرەزيدەنتكە ايماق تۇرعىندارىنا ۆاكتسينا سالۋ بارىسى، ءىرى ونەركاسىپ كاسىپورىندارىنىڭ سۇرانىسىنا بايلانىستى ۆاكتسينا كولەمىن ارتتىرۋ قاجەتتىگى تۋىنداپ وتىرعانى تۋرالى ايتتى.

قاسىم-جومارت توقاەۆقا وبلىستىڭ ۇكىمەتپەن بىرلەسە وتىرىپ، دامۋدىڭ كەشەندى جوسپارىن ازىرلەۋ جونىندەگى مەملەكەت باسشىسىنىڭ بۇعان دەيىن بەرگەن تاپسىرمالارىنىڭ ورىندالۋ بارىسى تۋرالى باياندالدى. اكىمنىڭ ايتۋىنشا، اتالعان جوسپاردىڭ ىسكە اسىرىلۋى وبلىستىڭ الەۋمەتتىك-ەكونوميكالىق دامۋىنا تىڭ سەرپىن بەرىپ، جەرگىلىكتى تۇرعىنداردىڭ تۇرمىس ساپاسىن ارتتىرادى.

مەملەكەت باسشىسى اتىراۋ وبلىسىنىڭ اكىمىنە مەديتسينالىق قىزمەت كورسەتۋ سالاسىنداعى وزەكتى ماسەلەلەردى شەشۋ، سونداي-اق، مەكتەپتەردەگى ءبىلىم بەرۋ ساپاسىن ارتتىرۋ جونىندە بىرقاتار تاپسىرما بەردى.

اقتوبە وبلىسىنىڭ اكىمى وڭداسىن ورازالين پرەزيدەنتكە كوروناۆيرۋس ىندەتىنە قارسى كۇرەس بويىنشا قابىلدانىپ جاتقان شارالار جايىندا ەسەپ بەردى. سونىمەن قاتار مەملەكەت باسشىسىنا ءوڭىردىڭ الەۋمەتتىك-ەكونوميكالىق دامۋىنىڭ نەگىزگى كورسەتكىشتەرى، سونىڭ ىشىندە، ينۆەستيتسيا تارتۋ، تۇرعىن ءۇي سالۋ، يندۋستريالاندىرۋ كارتاسى اياسىنداعى جوبالاردىڭ جۇزەگە اسىرىلۋى جونىندە باياندالدى.

اڭگىمەلەسۋ سوڭىندا قاسىم-جومارت توقاەۆ وڭداسىن ورازالينگە وڭىردەگى سانيتارلىق-ەپيدەميولوگيالىق احۋالدى تۇراقتاندىرۋعا جانە ازاماتتاردى ۆاكتسينالاۋ جۇمىستارىن جانداندىرۋعا قاتىستى بىرقاتار تاپسىرما بەردى.

 

سوڭعى جاڭالىقتار

اقىرەتكە دەيىنگى ادالدىق

ونەر • بۇگىن، 10:23

ۇقساس جاڭالىقتار