ءىس-شارالار مەن جوبالار مەرەيتويلىق جىلدىڭ باستى يدەياسى «جاسامپازدىققا تولى جىلدار» بەلگىسىمەن وتكىزىلەدى.
قازاقستان تاۋەلسىزدىگىنىڭ 30 جىلدىعىن مەرەكەلەۋدىڭ ءساۋىر ايىنداعى كەستەسى وقۋدا, عىلىمدا جوعارى جەتىستىكتەردى كورسەتىپ جۇرگەن جاس تالانتتى قازاقستاندىقتاردى تانىتۋ جانە قولداۋ جونىندەگى بىرقاتار ءىس-شارالاردى قامتيدى.
«جاستارعا مىقتى تاۋەلسىز قازاقستاندى قۇرۋعا ونىڭ ءوز ءبىلىمىن, ۋاقىتى مەن كۇشىن جۇمساۋىنا قولايلى جاعداي جاساۋ قاجەت», دەپ اتاپ ءوتتى پرەزيدەنت ق. توقاەۆ قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋگە دايىندىق جونىندەگى مەملەكەتتىك كوميسسيانىڭ ءبىرىنشى وتىرىسىندا.
بۇل رەتتە قازاقستاندا جاس عالىمداردى قولداۋعا باعىتتالعان بىرقاتار جوبالار ىسكە قوسىلدى.
نۇرسۇلتان نازارباەۆ قورى ەلىمىزدىڭ عىلىمي ۇيىمدارى مەن جوعارى وقۋ ورىندارى جانىنداعى ۇزدىك جاس عالىمدار كەڭەسى بايقاۋىن جاريالادى. جەڭىمپازدى انىقتاۋ كەزىندە بايقاۋ كوميسسياسىنىڭ مۇشەلەرى جاس عالىمدار كەڭەسىنىڭ بەلسەندىلىگى مەن جۇمىسىنىڭ ناتيجەلىلىگىنە قاراي باعالايتىن بولادى. سونداي-اق قور قازاقستان رەسپۋبليكاسىنىڭ جوعارى وقۋ ورىندارى مەن عىلىمي ۇيىمدارىندا عىلىمنىڭ, تەحنولوگيالار مەن تەحنيكانىڭ باسىم باعىتتارى بويىنشا قولدانبالى عىلىمي-زەرتتەۋ جوبالارى مەن جاس عالىمداردىڭ جۇمىستارىن قارجىلاندىرۋدى ۇسىنۋ بويىنشا گرانتتار الۋعا كونكۋرس جاريالادى.
ءبىلىم جانە عىلىم مينيسترلىگى قازاقستاندىق عالىمداردىڭ عىلىم مەن جاڭا تەحنولوگيالاردىڭ ءارتۇرلى سالالارىنداعى جەتىستىكتەرىن تانىمال ەتۋ بويىنشا «GYLYM TALKS» ينتەرنەت-جوباسىن ىسكە قوستى. سونىمەن قاتار, وسى اي ىشىندە «اقىلدى ۇرپاق» جاس عالىمداردىڭ ونلاين-فورۋمىن وتكىزۋ جوسپارلانۋدا.
ايتا كەتەيىك, بۇگىندە قازاقستاننىڭ عىلىم سالاسىندا 22 مىڭعا جۋىق مامان جۇمىس ىستەيدى. قازاقستاننىڭ عىلىمي قىزمەتكەرلەرىنىڭ 34% - دان استامىن 35 جاسقا دەيىنگى قىزمەتكەرلەر قۇرايدى.
