رەسپۋبليكا اۋماعىندا باكتەريالىق كۇيىك العاش رەت 2000 جىلداردىڭ باسىندا تىركەلدى جانە ونىڭ تارالۋ ايماعى جىلدان جىلعا كەڭەيۋدە. سوڭعى جىلدارى وسى اۋرۋدى جۇقتىرعان باقتاردىڭ اۋماعى 50 ەسە ءوستى.
«قازاقستان رەسپۋبليكاسىنىڭ «وسىمدىكتەر كارانتينى تۋرالى» زاڭىنا سايكەس, باكتەريالىق كۇيىك ينفەكتسياسىنىڭ وشاقتارىن انىقتاعان كەزدە 30 شاقىرىم راديۋستاعى اعاشتار مەن بارلىق وسىمدىكتەردى تامىردان تازارتۋ, ورتەۋ بويىنشا كارانتيندىك شارالاردى جۇرگىزۋگە ءماجبۇر بولادى, ول ءوز رەتىندە ميللياردتاعان شىعىندارمەن قاتار ەكولوگيالىق زارداپتارعا اكەلەدى. ماسەلەن, 2017-2020 جىلدارى الماتى وبلىسى اۋماعىندا باكتەريالدى كۇيىگىمەن زالالدانعان باقتار كولەمى جىل سايىن 1 مىڭ گەكتارعا دەيىن القاپتى قۇراپ وتىر, وبلىس بويىنشا 200 گەكتارعا دەيىن باقتى زالالدانعان اعاشتاردى تۇبىرىمەن قوپارۋ جۇمىستارى جۇرگىزىلگەن», دەدى سۇلتان دۇيسەمبينوۆ.
دەپۋتات مامانداردىڭ پايىمداۋىنشا, باكتەريالىق كۇيىككە قاتىستى ءتيىستى شارالاردى جۇرگىزبەۋ, ەلىمىزدىڭ بارلىق جەمىس ەكپەلەرىنىڭ 50 پايىزدان استامى مەن الما باقتارىنىڭ تولىقتاي جوعالۋىنا سوقتىرۋى مۇمكىندىگىن اتاپ ءوتتى. سوندىقتان سەناتور ءبىلىم جانە عىلىم مينيسترلىگىنە - جەمىس داقىلدارىنىڭ باكتەريالىق كۇيىگىنە قارسى عىلىمي زەرتتەۋلەردى جانە وتاندىق بيوپرەپاراتتاردى كەڭ اۋقىمدى سىناۋ بويىنشا باعدارلامالىق-ماقساتتى قارجىلاندىرۋ, قر اۋىل شارۋاشىلىعى مينيسترلىگىنە - بيوپرەپاراتتاردى سەريالىق ءوندىرۋ بويىنشا ءتيىستى جۇمىستاردى ۇيىمداستىرۋدى تاپسىرۋ ورىندى دەپ سانايدى.
