قالانىڭ پوليتسيا دەپارتامەنتى ەمحاناسىنىڭ تەراپەۆت دارىگەرى ايدانا ءابدىپاتتانىڭ ايتۋىنشا, قازىر «سپۋتنيك V» ۆاكتسيناسىن الۋعا ۋچاسكەلىك پوليتسەيلەر مەن ىشكى ىستەر سالاسىنىڭ ارداگەرلەرى كەلىپ جاتىر.
«ولار حالىقپەن تىكەلەي جۇمىس ىستەيتىندىكتەن ەكپە الۋعا وزدەرى كەلۋدە. ءبىز مەديتسينالىق تالاپقا ساي, ۆاكتسينا سالۋ جايلى ولارعا ءتۇسىندىرىپ, تانىستىرىپ جاتىرمىز. تالابىمىزعا سايكەس قاراپ, باقىلاپ, سوسىن عانا جۇمىسىمىزعا كىرىسەمىز. بۇگىنگە دەيىن قارسى كورسەتكىشتەر بولعان ەمەس. بىزدە ءبارى تالاپقا ساي جۇرگىزىلەدى», دەدى ايدانا ءابدىپاتتا.
ەكپە جاساتقانداردىڭ ءبىرى – نۇر-سۇلتان قالاسى پاترۋلدىك پوليتسيا ينسپەكتورى, اعا لەيتەنانت ساكەن تاسقىن.
«بۇگىن مەن ۆاكتسينا سالدىردىم. قازىرگى ساتتە ءوزىمدى وتە جاقسى سەزىنىپ تۇرمىن. حالىقپەن جۇمىس ىستەپ جۇرگەندىكتەن ءوز ەركىممەن ەكپە سالعىزدىم», دەدى ساكەن تاسقىن.
