وقيعا باتىس قازاقستان وبلىسى, اقجايىق اۋدانى, قاراۋىلتوبە اۋىلىندا 25 ناۋرىزدا بولدى.
№27 ءورت ءسوندىرۋ بەكەتىنىڭ باستىعى اقان نۇرعاليەۆ اۋىر سوققىلاردىڭ ناتيجەسىندە قايتىس بولدى. مارقۇمنىڭ اعاسى رۋسلان نۇرعاليەۆتىڭ ايتۋىنشا, ءبولىم باسشىسىن ارىپتەستەرى تۇنگى ساعات 23:00 شاماسىندا جۇمىسقا شاقىرعان. سەبەبى حابارلاۋشىعا بەلگىسىز.
ء«ورت ءسوندىرۋ بەكەتىندە ەكى ءورت سوندىرۋشىدەن باسقا تاعى ەكى سىرتتان كەلگەن ادام بولعان. بارلىعىنىڭ ماس كۇيدە بولعانى انىقتالدى. مەن قانداي جانجال شىققانىن, كىم كىمدى ۇرعانىن بىلمەيمىن, بىراق مەنىڭ اعام قاتتى سوققىعا جىعىلعان. ءورت ءسوندىرۋ بولىمىندە دالەلدەمەلەردى جاسىرۋ ءۇشىن كامەرالار بۇزىلدى. كەلەسى كۇنى اعام باۋىرىمىزدىڭ قوراسىنان تابىلدى, ولاردىڭ ءۇيى اۋىلدىڭ شەتىندە ورنالاسقان. تاڭەرتەڭ جەڭگەم قورادا بىرەۋدىڭ جاتقانىن كورىپ, اعامدى تانىعان. بۇل تۋرالى بىزگە بىردەن حابار بەرىپ, جەدەل جاردەم شاقىرىلدى. ول دەرەۋ وبلىستىق اۋرۋحانانىڭ جانساقتاۋ بولىمىنە جەتكىزىلدى. ال 27 ناۋرىزدا تاڭعى ساعات 5-تە قايتىس بولدى. ارتىنان ءۇش بالاسى جەتىم قالدى», دەدى رۋسلان نۇرعاليەۆ.
باتىس قازاقستان وبلىستىق پوليتسيا دەپارتامەنتىنىڭ ءباسپاسوز قىزمەتى اتالعان فاكت بويىنشا سوتقا دەيىنگى تەرگەۋ امالدارى جۇرگىزىلىپ جاتقانىن حابارلادى.
