قوعام • 15 ناۋرىز، 2021

«تۋرالىقتى تۇعىر ەتكەن تولە بي» اتتى ادالدىق ساعاتى ءوتتى

185 رەت كورسەتىلدى

سىبايلاس جەمقورلىققا قارسى ءىس-قيمىل اگەنتتىگىنىڭ كەزەكتى «ادالدىق ساعاتى» قازاق حالقىنىڭ شەشەندىك ونەرىنە، ەل بىرلىگىن نىعايتۋعا وراسان ۇلەس قوسقان ويشىل، دانا، تۋرالىعىن ايتار شەشەن تولە بي بابامىزدىڭ جاس ۇرپاققا ونەگە بولار عيبراتتى عۇمىرى مەن وسيەتتەرىنە، دانالىعى مەن جەكە قاسيەتتەرىنە ارنالدى، دەپ حابارلايدى Egemen.kz.

«تۋرالىقتى تۇعىر ەتكەن تولە بي» تاقىرىبىنداعى ونلاين-بەينەدارىس بارىسىندا جاستار تولە ءبيدىڭ وسىنشا تاريحي بيىك تۇلعا دارەجەسىنە جەتۋىنە سەبەپ بولعان تۇلعالىق قاسيەتتەرىمەن تانىستى.

سونىڭ نەگىزگىلەرى: ەل مۇراتىنا دەگەن كىرشىكسىز ادالدىق، بيلىك ايتارداعى قارا قىلدى قاق جارعان ادىلدىگى، اقيقاتتى تۋ ەتىپ كوتەرۋى.

تولە ءبيدىڭ ومىرلىك ۇستانىمىنداي بولعان «تۋرا بيدە تۋعان جوق، تۋعاندى بيدە يمان جوق» دەگەن ءسوزى ادالدىق پەن پاراساتتىلىقتىڭ، ادىلدىك پەن تۋرالىقتىڭ بيىك ولشەمى. ناقتى وسى قاسيەتتەرى بۇگىنگى وسكەلەڭ جاس ۇرپاق ءۇشىن – تاپتىرماس ونەگە.

تولە ءبيدىڭ ءومىرى دۇنيەگە جاڭا قادام باسقان جاستاردان باستاپ، ەرەسەك تۇلعالارعا دەيىن رۋحاني ۇستانىم بولا الادى.

زامانىن بولجاي بىلگەن تولە بي «الدىڭا كەلسە بىتپەس داۋ، ءادىلىن ايتىپ قورعاڭىز» دەپ ادىلدىكتى ەڭ باستى قۇندىلىق رەتىندە ۇستانادى. سوندىقتان دا بابامىزدىڭ ءاربىر ءسوزى تاربيەلىك ءمانى زور ادامگەرشىلىكتىڭ التىن قويماسى ىسپەتتەس.

تولە بي ءار ىستە ۇياتتى ۇمىتپاۋعا شاقىرادى. جامان قاسيەتتەردەن الشاق بولۋعا، ەڭبەكسۇيگىشتىككە ۇندەيدى: «جاس ادامعا باستى كەسىر – ەرىنشەكتىك، ورتانشى كەسىر – ۇيقىشىلدىق، كەنجە كەسىر – تىلازارلىق» دەپ جاعىمسىز قاسيەتتەردەن ساقتاندىرادى.

تولە بي بابامىزدىڭ ىزگى ارەكەتتەرى مەن بيىك بولمىسى، دانالىعى مەن تاپقىرلىعى، قارا قىلدى قاق جارىپ ايتار تۋرالىعى، ءادىل شەشىمى مەن بيلىك كەسىمدەرى ەلگە قىزمەت ەتەمىن دەگەن ءاربىر ازاماتقا ۇلگى بولۋى ءتيىس.

دانا ءبيدىڭ ۇرپاعىنا امانات ەتكەن اسىل سوزدەرى ناعىز اقيقات پەن پاراساتتىلىقتىڭ ۇشقىنى رەتىندە «ماڭگىلىك ەل» يدەياسىمەن ۇشتاسىپ جاتقانداي.

ەستەرىڭىزگە سالا كەتسەك، اگەنتتىكپەن جاستار اراسىندا پاراساتتىلىق پەن پاتريوتتىق سەزىمدى نىعايتۋ ماقساتىندا، ءار اپتا سايىن اتاقتى تۇلعالار مەن قازاقستاننىڭ جاس كوشباسشىلارىنىڭ ەڭبەگى مەن ءومىر جولىنا نەگىزدەلگەن ونلاين «ادالدىق ساعاتتارى» وتكىزىلۋدە.

سوڭعى جاڭالىقتار

پرەزيدەنت الماتى اكىمىن قابىلدادى

پرەزيدەنت • بۇگىن، 14:07

وتكەن تاۋلىكتە 187 ادام ىندەت جۇقتىردى

كوروناۆيرۋس • بۇگىن، 10:40

دوللار ارزاندادى

قارجى • كەشە

ۇقساس جاڭالىقتار