«رەفورما بارىسىندا حالىقارالىق تاجىريبە ەسكەرىلەتىنىن اتاپ ءوتتىڭىز. بۇل رەتتە دامىعان ەلدەر قاتارىندا پوليتسەيلەردىڭ ەڭبەك جىلدارىنىڭ شەكتى مەرزىمى قازاقستاندىقتارعا قاراعاندا ايتارلىقتاي جوعارى. ماسەلەن, گەرمانيادا, كانادادا, اقش-تا جانە جاپونيادا قۇقىق قورعاۋ ورگاندارى قىزمەتكەرلەرى ءۇشىن زەينەتكەرلىككە شىعۋ 65 جاستى قۇرايدى. رەسەيدە 2016 جىلدان باستاپ پولكوۆنيكتەردىڭ بەكىتىلگەن شەكتى جاسى – 60 جاس. قازاقستاندا قىزمەتكەرلەردىڭ شەكتى جاسى پولكوۆنيكتەر ءۇشىن 55 جاس. سول سەبەپتى ءالى دە بولسا جۇمىسقا جارامدى جوعارى كاسىبي كادرلاردىڭ تۇراقسىزدىعى بايقالادى. پوليتسەيلەردىڭ زەينەتكەرلىككە شىعۋىنىڭ قولدانىستاعى تەتىگى قانشالىقتى ءتيىمدى؟», دەپ سۇرادى سەناتور ءابدالى نۇراليەۆ.
ۆەدومستۆو باسشىسى قازىرگى كەزدە پوليتسياداعى قىزمەتكەرلەردىڭ كوبىسى وتە تاجىريبەلى ءارى كاسىبي ماماندار ەكەنىن تىلگە تيەك ەتتى.
«ولاردىڭ كوبىسى كەزىندە زەينەتكە شىققىسى كەلمەدى. بىراق زاڭدى تۇردە 45-تەن 55 جاسقا دەيىن قىزمەتتەن كەتۋگە ءماجبۇر بولدى. ولاردىڭ ءبىرازى قازىر كۇزەت سەكىلدى جەكە فيرمالاردا جۇمىس ىستەيدى. قازىرگى ۋاقىتتا ءتيىستى جۇمىس توبىن قۇرىپ, وسى ماسەلەنى كوتەرىپ جاتىرمىز», دەدى ە.تۇرعىمباەۆ.
وسىعان بايلانىستى مينيستر قىزمەتكەرلەردىڭ زەينەت جاسىنا شىعۋ ماسەلەسى پىسىقتالىپ جاتقانىن ايتتى.
«حالىقارالىق تاجىريبە سۇيەنسەك, باسقا ەلدەردە بۇل جۇيە وزگەشەلەۋ. ءبىز وسىنى زەردەلەپ, سوعان جاقىنداتىپ جاتىرمىز», دەدى مينيستر.
مىسالى, مايورلارعا 52 جاستان (4 جىل قوسىپ) زەينەتكە شىعۋ, ال پودپولكوۆنيكتەرگە – 55 جاستان, پولكوۆنيكتەرگە 58 جاستان جانە جوعارى باسقارۋ قۇرامىنا 63 جاستان باستاپ ەسكەرىلىپ وتىر.
