«ماشينا جاساۋ سالاسىندا 121,2% ءوسىم بولدى. اۆتوكولىك قۇرالدارى, ترەيلەرلەر جانە اشىق تىركەمەلەر, ماشينالار مەن جابدىقتار ءوندىرىسى, وزگە دە كولىك قۇرالدارى, كومپيۋتەرلەر, ەلەكتروندىق جانە وپتيكالىق جابدىقتار, ەلەكتر جابدىقتارىن جاساۋ, جوندەۋ جانە ورناتۋ كولەمى ارتتى», — دەدى مينيستر ب. اتامقۇلوۆ.
سونداي-اق, ونىڭ ايتۋىنشا, ءتۇستى مەتاللۋرگيادا دا وڭ ديناميكا ساقتالىپ, ءوسىم 5,4% بولدى. وعان تازارتىلعان التىن, تازارتىلعان كۇمىس, قۇيما التىن, تۇيىرشىكتەردەگى كۇمىس, كاتودتى مىستىڭ جانە باسقا دا كورسەتكىشتەردىڭ ءوسىمى ەسەبىنەن قول جەتكىزىلدى.
قارا مەتاللۋرگيادا ناقتى كولەم يندەكسى 100,1% قۇرادى. شويىن, فەررو-سيليكو-مارگانەتس ءوندىرىسى ءوستى. فارماتسەۆتيكا ونەركاسىبىندە ءوندىرىس كولەمى 9,2% ارتتى. شىعارىلاتىن ءونىم كولەمى «حيمفارم» اكتسيونەرلىك قوعامىندا 3 ەسە جانە «نوبەل الماتى فارماتسەۆتيكالىق فابريكاسىندا» 27% ۇلعايدى. سالاداعى ءوسىم نەگىزىنەن حالىقتىڭ دارىلىك زاتتار مەن مەديتسينالىق بۇيىمدارعا دەگەن سۇرانىسىنىڭ ارتۋى ەسەبىنەن بولدى. جەڭىل ونەركاسىپتە ءوندىرىس 3,5% ءوستى. وعان كيىمنىڭ جانە بىلعارى ونىمدەردىڭ ۇلعايۋى اسەر ەتتى.
دەزينفەكتسيالىق قۇرالدار مەن مينەرالدىق تىڭايتقىشتارعا سۇرانىستىڭ ارتۋى حيميا ونەركاسىبىنىڭ ءوندىرىس كولەمىن ارتتىردى. ءوسىم 14,1% قۇرادى. قۇرىلىس ماتەريالدارى ءوندىرىسى 122,9% بولدى. وعان پورتلاند-تسەمەنت, گيپس ءوندىرىسىنىڭ ارتۋى ەسەبىنەن قول جەتكىزىلدى.
سونىمەن قاتار ب. اتامقۇلوۆتىڭ ايتۋىنشا, ترانزيتتىك كونتەينەرلىك تاسىمالدا وڭ ديناميكا ساقتالدى. كورسەتكىش 156,5 مىڭ جيىرما فۋنتتىق بالامانى قۇرادى. ءوسىم 79% بولدى. كولىكتىڭ بارلىق تۇرىمەن جۇك تاسىمالداۋ كولەمى 0,55 ملرد توننا نەمەسە وتكەن جىلدىڭ سايكەس كەزەڭىمەن سالىستىرعاندا 96,5% قۇرادى.
«قۇرىلىس سالاسىندا ناقتى كولەم يندەكسى 2021 جىلدىڭ قاڭتار-اقپان ايلارىندا 109,7% بولدى. 15 وڭىردە وڭ كورسەتكىش تىركەلدى», — دەدى قر يدم ءمينيسترى.
سونداي-اق تۇرعىن ءۇي قۇرىلىسىندا بيىلعى ەكى ايدا 1 893 مىڭ شارشى مەتر باسپانا پايدالانۋعا بەرىلدى. ياعني, 2020 جىلدىڭ سايكەس كەزەڭىمەن سالىستىرعاندا 112,8% قۇرادى. رەسپۋبليكا بويىنشا بارلىعى 15 807 باسپانا پايدالانۋعا بەرىلدى. وتكەن جىلمەن سالىستىرعاندا بۇل كورسەتكىش بارلىق وڭىردە ارتتى. جالپى بيىل ەلىمىزدە 17 ملن شارشى مەتر تۇرعىن ءۇي سالىنادى.
