وبلىسىنىڭ قوعامدىق كوممۋنيكاتسيا ورتالىعىندا وتكەن بريفينگتە اقتاۋ قالاسىنىڭ باس سانيتار دارىگەرى 1, 2, 3-كلاستاعى حيميالىق زاتتارمەن تەك ارنايى ليتسەنزياسى بار مامانداردىڭ دەزينسەكتسيا جاساۋىنا بولاتىنىن ايتتى. ونىڭ ايتۋىنشا جاعدايىندا ءوز بەتىنشە 4-ساناتتاعى پرەپاراتتارمەن جۇمىس ىستەۋگە رۇقسات ەتىلگەن.
«جالپى زالاسىزداندىرۋ جۇمىستارى مىندەتتى تۇردە رەسپۋبليكالىق رەەستر تىزىمىندە بار پرەپاراتتارمەن جۇرگىزىلەدى. ياعني, سول تىزىمدە جوق زاتتاردى رەسپۋبليكا ايماعىندا پايدالانۋعا قاتاڭ تىيىم سالىنعان. رەەستر ءتىزىمى ينتەرنەت جەلىسىندە بار», دەدى ءا. جارىلعاسوۆا.
ونىڭ ايتۋىنشا, جاقىندا اقتاۋ قالاسىنىڭ ەكى تۇرعىنى حيميالىق ۋلانۋدان قايتىس بولعان. قۇزىرلى ورگاندار انىقتاعانداي اقتاۋ قالاسىنىڭ تۇرعىنى «كۆيكفوس» پرەپاراتىمەن (جاندىكتەرگە قارسى پرەپارات) كورشىلەرىن ەسكەرتپەستەن ءوز پاتەرىن دەزينسەكتسيالايدى. پاتەرىن زالالسىزداندىرىپ بولعان سوڭ, ءۇيىن كىلتتەپ باسقا شاعىناۋدانعا كەتكەن. كەيىن كورشىلەرىنىڭ دەنساۋلىعى ناشارلاي باستاعان. سالدارىنان كورشى ايەل مەن ونىڭ قىزى كوز جۇمدى.
باس سانيتاردىڭ سوزىنە سەنسەك, وڭىردە جاندىكتەردى ۋلاۋ پرەپاراتتارىن ءۇي جاعدايىندا قولدانىپ, سالدارىنان بولعان قايعىلى وقيعا فاكتىلەرى 2017, 2018, 2019 جىلدارى تىركەلگەن.
«قالاداعى بارلىق تۇرعىن ۇيلەردىڭ تازالىعىنا جاۋاپتى مەكەمەلەردە زالاسىزداندىرۋمەن اينالىساتىن ۇيىمداردىڭ ءتىزىمى بار. ماسەلەن, اقتاۋدا تازالاۋ جۇمىستارىن جۇرگىزۋگە رۇقساتى بار 8 مەكەمە جۇمىس ىستەيدى. قالا تۇرعىندارى كەز-كەلگەن ۋاقىتتا ارنايى ۇيىمداردىڭ قىزمەتىنە جۇگىنە الادى. ەگەر ۇيدە زارارسىزداندىرۋ جۇرگىزىلسە, تۇرعىندار مىندەتتى تۇردە ونى كورشىلەرىنە ەسكەرتىپ, پودەزگە حابارلاندىرۋ ءىلۋى قاجەت. بۇل – ۋلانۋ جاعدايلارىنىڭ الدىن الادى», - دەدى ول.
