بۇل تۋرالى وزبەكستاننىڭ ۇلتتىق وليمپيادا كوميتەتى حابارلادى.
جاقىندا تاشكەنتتە تەكبول حالىقارالىق فەدەراتسياسى جانە ۇلتتىق وليمپيادا كوميتەتى اراسىندا ىنتىماقتاستىق تۋرالى مەموراندۋمعا قول قويىلدى. قۇجاتقا سايكەس, حالىقارالىق ۇيىم جاقىن ارادا وزبەكستانعا ون مىڭ بىرلىك مولشەرىندە مۇكاممال بەرەدى, ال حالىققا ءبىلىم بەرۋ مينيسترلىگى مەن ۇوك وسى سپورت ءتۇرىن ەلدە تانىمال ەتۋ ماقساتىندا ىنتىماقتاسپاق.
ء«ىس-شارا باستالاردان بۇرىن تەكبولدىڭ وتە قىزىقتى سپورت ءتۇرى ەكەنىنە تاعى ءبىر كوز جەتكىزدىم. بۇل جاڭا سپورت ءتۇرى بارلىق وقۋشىنىڭ سۇيىكتى ويىنىنا اينالادى دەپ سەنەمىن. ونىڭ كومەگىمەن ءبىز بىردەن بەس-التى سپورت ءتۇرىن بىرىكتىرە الامىز. ال بۇل وقۋشىلار اراسىندا سالاۋاتتى ءومىر سالتىن ناسيحاتتاۋ جانە ولاردىڭ بوس ۋاقىتىن ۇيىمداستىرۋ پروتسەسىندە وتە ماڭىزدى», دەدى وزبەكستان رەسپۋبليكاسىنىڭ حالىققا ءبىلىم بەرۋ ءمينيسترى شەرزود شەرماتوۆ.
ء«بىز تەكبول فەدەراتسياسىنا وزبەكستاندا وسى سپورت ءتۇرىن تانىمال ەتۋگە باستاما العانى ءۇشىن العىس ايتامىز. بۇل سپورت الەمدە وتە جىلدام دامىپ كەلەدى. تەكبول وزبەكستان پرەزيدەنتى ۇسىنعان سالاۋاتتى ءومىر سالتىن ناسيحاتتاۋ ءۇشىن وتە قولايلى. بۇل سپورت ءتۇرى بولاشاقتا ازيا جانە وليمپيادا ويىندارىنىڭ باعدارلاماسىنا ەنۋى مۇمكىن», دەپ اتاپ ءوتتى ۇوك باس حاتشىسى ويبەك قاسىموۆ.
تەكبول – ۇستەل تەننيسىن ەسكە تۇسىرەتىن جاڭا سپورت ءتۇرى, وندا قيسىق ۇستەل مەن فۋتبول دوبىنا ۇقساس دوپ قولدانىلادى. دوپتى قولدان باسقا دەنەنىڭ كەز كەلگەن بولىگىمەن ۇرۋعا بولادى. تەكبولدى 2014 جىلى ۆەنگريادا ەكى فۋتبول اۋەسقويى ويلاپ تاپتى: بۇرىنعى كاسىبي فۋتبولشى گابور بورشاني جانە باعدارلاماشى ۆيكتور حۋسار.
