ءبارىن باسىنان باستايىن. 2014 جىلدان بەرى ورال قالاسىندا تۇردىق. كۇيەۋىم ايبەك ەش جۇمىستان تارتىنبايتىن ەڭبەكقور ەدى. كوبىنە قۇرىلىس جۇمىسىمەن اينالىسىپ, وتباسىن تارىقتىرعان جوق. سوڭعى كەزدە ورال قالاسىنىڭ ىرگەسىندە ساياجاي ءۇيىن ايىنا 15 مىڭ تەڭگەگە جالداپ تۇردىق. سۋدى دالادان تاسىپ, وت جاعىپ وتىرساق تا وعان رەنجىمەدىك. كىشى قىزىمىز ايلينا دۇنيەگە كەلگەن سوڭ «كوپ بالالى وتباسى» اتانىپ, مەملەكەتتىك جاردەماقى الا باستادىق. وتباسىنىڭ كىرىسى كوبەيىپ, بولاشاقتان ءۇمىتىمىز كوپ ەدى. اتتەڭ...
قاڭتاردىڭ 11-ءى ەستەن كەتەر مە؟ جاڭاقالانىڭ قىزىلوبا اۋىلىنان ورالعا تاكسيمەن شىققانبىز. جول اپاتىنىڭ قالاي بولعانىن دا بىلمەيمىن. بالالارمەن كولىكتىڭ ارتقى جاعىندا وتىر ەدىم. قارسى كەلە جاتقان جۇك كولىگىنىڭ سوڭىنان شىعا كەلگەن اتىراۋلىق تاكسي ءبىز مىنگەن كولىككە تۋرا سوعىلىپتى. ءبىزدىڭ جۇرگىزۋشىنىڭ اياعى سىندى, جانىندا وتىرعان جولاۋشى ايەل سول جەردە ءتىل تارتپاي كەتتى. مەنىڭ كۇيەۋىم ايبەكتى جەدەل جاردەم اقجايىق اۋداندىق اۋرۋحاناسىنا جەتكىزگەنىمەن, ەكى كۇن ەس-ءتۇسسىز جاتىپ, قايتىس بولدى. ءبىزدىڭ كولىكتەگى جولاۋشىلاردىڭ ءبارى زارداپ شەكتى. ۇلكەن ۇلىم ادىلبەك پەن ەكى جاسار الميرامنىڭ يىعى سىنعان, اقەركەمنىڭ سول اياعى سىندى. ەكى ايلىق ايلينام ەكەۋمىزدى پەرىشتە قاققان شىعار, ءسابيىم موينىن اۋىرتىپ العانىمەن امان قالدى. قيىن كۇندەر ءوتتى عوي, شىرىلداپ بالالارىمنىڭ جانىندا, اۋرۋحانادا ءجۇردىم...
30 جاستان اسا بەرە 4 بالامەن جەسىر قالۋ وڭاي ما؟ ءۇيسىز-كۇيسىز جەتىم قالعان بالالارىمنىڭ بولاشاق تاعدىرىن ويلاپ, قايعىدان قان جۇتقانىم راس. دەگەنمەن, حالقىمىزدىڭ «قايعىنى بولىسسە, ازايادى» دەگەنى راس ەكەن. ءبىزدىڭ جاعدايىمىزدى ەستىپ, الەۋمەتتىك جەلىدە ەل-جۇرتقا جاريا سالعان ايبولات بوكەنوۆ دەگەن ازامات بولدى. بۇرىن تانىمايتىن, بىلمەيتىن بلوگەر جىگىت ءبىزدىڭ وتباسىنىڭ باسىنا تۇسكەن قايعىنى وزىنىكىندەي قابىلداپ, بىرنەشە جازبا جاريالاپتى. ەل اعالارىن, قايىرىمدى جانداردى ۇيىمداستىرىپتى.
بىزگە ەڭ الدىمەن كومەكتەسكەندەر – ورال قالاسى اكىمىنىڭ ورىنباسارى باقىتجان نارىمبەتوۆ پەن ورال قالالىق ءماسليحاتىنىڭ دەپۋتاتى نۇرگۇل اشىقوۆا. دەپۋتاتىمىز بىزگە ۋاقىتشا پانالاۋ ءۇشىن جايلى پاتەر جالداپ بەردى. ءدارى-دارمەكپەن, قارجىلاي كومەكتەسكەندەر كوپ بولدى. ەڭ ۇلكەن قاجەتتىلىگىمىز – باسپانا ەدى. وسى كەزدە ورتاعا «حارەكەت» قايىرىمدىلىق قورى ارالاسىپ, قارجى جيناۋعا كىرىستى. قوردىڭ رەسپۋبليكالىق باسشىسى گۇلميرا مۇقانقىزى, جەرگىلىكتى فيليال توراعاسى دەمەجان باۋىرىمىز ءبىر اي ىشىندە ءتيىستى قارجىنى جيناپ, ورال قالاسىنىڭ ىرگەسىنەن – تەرەكتى اۋدانى پودستەپنوي اۋىلىنان 2 بولمەلى جايلى پاتەردىڭ كىلتىن قولىمىزعا ۇستاتتى. 3 جىل بۇرىن قۇرىلىپ, تالاي جاننىڭ العىسىن الىپ جۇرگەن «حارەكەت» قورىنىڭ ۇيىمداستىرۋىمەن باسپانالى بولعان 410-شى وتباسى ءبىز ەكەنبىز. بۇل قانداي قۋانىش دەسەڭىزشى؟!
جاڭا باسپانامىز وتە جايلى, جىلى, بالاباقشا ءتيىپ تۇر ەكەن. مەكتەپ تە الىس ەمەس. ازىرگە ۇلىم ادىلبەكتىڭ ساباعى قاشىقتان ءجۇرىپ جاتىر عوي. قالعان قىزدارىم ۇيدە.
«تەڭىز تامشىدان قۇرالادى» دەمەكشى, بارشا جاردەمدەسكەن ادامدارعا مىڭ سان راحمەت ايتامىن. ەڭ باستىسى, ءبىزدىڭ باسىمىزعا تۇسكەن قايعىنى جۇرتقا جاريالاپ, قولداۋشى بولىپ, باسى-قاسىندا جۇرگەن ايبولات بوكەنوۆكە العىسىم شەكسىز. ءبىز سياقتى قيىن جاعدايدا قالىپ, كومەككە مۇقتاج بولعان جانداردى قۋانتىپ جۇرگەن «حارەكەت» قورىنا مىڭ العىس, اللادان قايتسىن!
ادام بالاسى باسىنا قيىن كۇن تۋعاندا قاۋمالاعان حالقىنىڭ قادىرىن انىق بىلەدى ەكەن. كۇتپەگەن جەردەن كەلگەن كەساپات بىزگە سونى ۇقتىرىپ كەتتى.
ادەمى ابىشەۆا,
كوپ بالالى انا
باتىس قازاقستان وبلىسى
