ناقتى ايتقاندا, Data Matrix كودىمەن 1700-دەن اسا وتاندىق جانە شەتەلدىك الكوگولدى ءونىم تاڭبالاندى. بۇل كودتى ءبىلۋ ءۇشىن ءتيىستى ونىمدەر تاۋارلاردى تاڭبالاۋ مەن قاداعالاۋ اقپاراتتىق جۇيەسىنە (تتق اج) ەنگىزىلەدى. وندا ءوندىرۋشى, يمپورتتاۋشى, تاۋار پارتياسىنىڭ سەريالىق ءنومىرى تۋرالى تسيفرلى اقپارات پەن ونى قاداعالاۋعا مۇمكىندىك بەرەتىن قاجەتتى مالىمەتتەر قامتىلعان. ورتالىق ماماندارىنىڭ ايتۋىنشا, Data Matrix كودىندا كريپتوقورعانىس تەتىگى قاراستىرىلعاندىقتان, ونى قولدان جاساۋ مۇمكىن ەمەس. دەمەك, ءار ءونىمدى وندىرۋشىدەن تۇتىنۋشىعا دەيىن جەتۋىن قاداعالاپ, كونترافاكتىلىك تاۋاردى الدىن الۋعا جاعداي قاراستىرىلىپ وتىر.
الكوگولدى ونىمدەردى تاڭبالاۋعا بايلانىستى قاناتقاقتى جوبا بيىل 30 قىركۇيەككە دەيىن جالعاسادى. قازىر بۇل جوباعا «كوكشەتاۋ مينەرالدى سۋلارى», «باحۋس», «ناتۋر پرودۋكت» زاۋىتتارى, سونداي-اق «پەرنو ريكار قازاقستان», «الدي ي ك», «قازاقستان ۆاين ەند سپيريتس» جانە «مارتيني باكاردي» سىندى يمپورتتاۋشى كومپانيالار قاتىسۋدا.
«الكوگولدى ءونىمدى تاڭبالاۋدىڭ ءوز ەرەكشەلىكتەرى بار. اتاپ ايتقاندا, ءار تاۋاردىڭ ەسەپ-باقىلاۋ ماركاسى (ەبم) بار. قازىر Data Matrix كودىن سولارعا ەنگىزۋدەمىز», دەدى تسيفرلى ەكونوميكانى دامىتۋ ورتالىعىنىڭ باس ديرەكتورى بيكەش قۇرمانعاليەۆا.
قازاقستاندا وسى نارىقتىڭ بارلىق قاتىسۋشىلارىنا مىندەتتى تسيفرلى تاڭبالاۋ 2022 جىلدىڭ ءبىرىنشى جارتىجىلدىعىنا ەنگىزىلەدى دەپ جوسپارلانىپ وتىر. وسى ارقىلى قۇزىرلى ورگاندار كولەڭكەلى اينالىمدى قىسقارتۋعا قاتىستى پروبلەمالاردى جۇيەلى تۇردە شەشۋدى كوزدەسە كەرەك. نەگە دەسەڭىز, ساراپشىلاردىڭ بولجامىنشا ەلىمىزدەگى كولەڭكەلى الكوگول نارىعى شامامەن 25%-دى قۇرايدى.
ء«باسپاسوز بەتتەرىنەن كونترافاكتىلىك الكوگول جايلى اقپاراتتى ءجيى ەستيتىنىمىز جاسىرىن ەمەس. مىسالى, تاياۋدا الماتى وبلىسىنىڭ اۋماعىندا جاسىرىن اراق زاۋىتى اشكەرەلەندى. دالىرەك ايتقاندا, ەسەپ-باقىلاۋ ماركالارى قولدان جاسالعان 170 مىڭ بوتەلكە انىقتالىپ, ولاردىڭ سەرتيفيكاتى جوق ەكەنى بەلگىلى بولدى. ياعني بۇل ونىمدەر ادامنىڭ دەنساۋلىعىنا قاۋىپتى. مۇنداي جاعداي از ەمەس. سوندىقتان تسيفرلى تاڭبالاۋ جاسىرىن وندىرۋشىلەرمەن كۇرەستە ماڭىزدى قادام سانالادى. سەبەبى ول قولدانىسقا ەنگىزىلگەن بويدا قولدان جاسالعان ءونىمدى بولشەك ساۋداعا ءتۇسىپ كەتپەۋىن تەجەۋگە بولادى», دەدى تسيفرلى ەكونوميكانى دامىتۋ ورتالىعىنىڭ باسقارۋشى ديرەكتورى نۇرجان باەكەەۆ.
بۇل ورايدا تاۋارلاردى تاڭبالاۋ ەۋرازيالىق ەكونوميكالىق وداق (ەاەو) اياسىندا ىسكە اسىرىلىپ جاتقان حالىقارالىق جوبا ەكەنىن ايتا كەتكەن ورىندى. بىلتىر رەسپۋبليكادا قازاننان باستاپ, بىرقاتار تەمەكى ونىمىنە مىندەتتى تاڭبالاۋ ەنگىزىلدى. جۋىردا اياق كيىمدى تاڭبالاۋعا قاتىستى قاناتقاقتى جوبا اياقتالدى. قازىر فارماتسەۆتيكالىق پرەپاراتتارعا, ءسۇت ونىمدەرى جانە جەڭىل ونەركاسىپ تاۋارلارىن تسيفرلى تاڭبالاۋعا بايلانىستى جوبالار قولعا الىنعان.
