قىزىلوردا وبلىسى بويىنشا سىبايلاس جەمقورلىققا قارسى ءىس-قيمىل دەپارتامەنتىنىڭ ماماندارى ازاماتتارعا جالعان انىقتامالاردى ساۋدالاپ كەلگەن دارىگەرلەردى انىقتادى. ولار كوروناۆيرۋس جۇقتىرماعانىن دالەلدەيتىن پتر سىنامانى 7 مىڭ تەڭگەگە باعالاعان.
«تەرگەۋ بارىسىندا ەكى ازاماتشادان 37 ءمور تاركىلەندى. بۇل ىسكە قانشا ادامنىڭ قاتىسى بارىن انىقتايتىن بولامىز», دەدى وبلىس بويىنشا سىبايلاس جەمقورلىققا قارسى ءىس-قيمىل دەپارتامەنتى باسشىسىنىڭ ورىنباسارى سۇلتان پىرمەتوۆ.
جالعان انىقتاما جاساۋشى قىزمەتكەرلەر ەكى مەديتسينالىق مەكەمەنىڭ وكىلدەرى بولىپ شىقتى. بىراق ولار ءبىر-بىرىمەن تىعىز بايلانىستا, ۇيىمداسقان تۇردە جۇمىس ىستەگەن. «اق حالاتتاعىلاردىڭ قىلمىسىنا بايلانىستى تەرگەۋ باستالدى. ولار بىلتىردان بەرى پتر-سىناماسىنىڭ تەرىس ناتيجەسى كورسەتىلگەن جالعان انىقتامالاردى ساتىپ كەلگەن. نەگىزىنەن ۆاحتالىق جۇمىسشىلارعا, ساياحاتقا شىعۋشىلارعا جانە باسقا دا ماقساتتا پايدالانۋ ءۇشىن انىقتامالار بەرىلگەن», دەيدى اگەنتتىكتىڭ ەرەكشە ماڭىزدى ىستەر جونىندەگى تەرگەۋشىسى دانيار بيعايداروۆ.
سونداي-اق ولار ۇلتتىق ساراپتاما ورتالىعىنىڭ ايماقتىق بولىمشەسىنىڭ لاۋازىمدى تۇلعالارىنا پارا بەرۋ ارقىلى زاڭسىز سىياقى العانى بەلگىلى بولدى.
